10 sngi ai por ban jurip ka tnad Tnat Urban bad DS Laitumkhrah

Ka Sorkar Jylla ka la buh teng shwa halor ka jingthmu pynkynriah ia ki nongdie madan na ki thain Laitumkhrah, Shillong bad la ai por 10 sngi ia ka tnad kam pynroi sor ne Tnat Urban Affairs bad ka Dorbar Shnong Laitumkhrah ba kin jurip lang ia ka jaka ba thmu pynkynriah ia ki nongdie madan.Ia kane la pyntip da u Symbud Myntri Rangbah ka Tnat Urban Affairs u Bah Sniawbhalang Dhar hadien ka jingialang pyrkhat kam ba la iashim bynta lang da ka MLA ka East Shillong ka Kong Ampareen Lyngdoh bad u Rangbah Shnong ka Laitumkhrah bad ha ka jingialang ym shym la lah ban pynbeit ia katto katne ki mat ba kongsan. Haba kren sha ki lad pathai khubor u Bah Sniawbhalang Dhar ula ong, “Ki la pan por na nga sa shiphew sngi bad nga la ai por shiphew sngi ban shim ia ka rai ba khadduh”.

“Ki don katto katne ki jaka ba ngi hap ban peit biang. Hapoh 10 sngi kan don ka jingjurip lang hapdeng ka Tnad Urban Affairs bad ka Dorbar Shnong ka Laitumkhrah bad kin sa aiti ia ka kaiphod. Ngin pyrshang ban pynkut ia kane ka kam kham kloi kat kaba lah” ula bynrap.U Bah Sniawbhalang ula pyntip ba ki ophisar kim pat don ka jingkhein ba thikna halor ka jingdon ki nongshong dukan die madan, namar ki dang don katto katne kiba dang wan shong dukan thymmai. Kumta hadien ba la ioh jingkhein baroh ki nongdie maan yn shim rai ha ka taiew ban wan. “Tang mar syndep pynbeit ka jingpynkynriah kan shim por la kumno kumno 30 sngi ban ai notice bad u kyrmen ba kane ka kam yn lah ban pyndep hapoh ar bnai katkum ka ain” ula bynrap.

Ka Kong Ampareen ka la ioh diang ia ki jingai jingmut ba la pynsngew da u Rangbah Shnong. “Ki don katto katne ki jyrwit namar ki surok ha ki thain Laitumkhrah ki dei kiba rit bad khapngiah bad ka jingiaid jingieng ki kali bad ki briew ruh ka jur bha”. “Namar kata ngi donkam ban leh janai bad phikir ia ka jingpynkynriah ha ki nongdie madan ha surok ba la don lypa bad pynpaw ka jingsngewnguh ia u DyCM uba la sngap ia ka Dorbar Shnong bad kyrmen skhem ba ki kam kin iaid beit shakhmat” ka la bynrap.