1700 metric ton u synsar na Ri Bhoi district yn die shabar ka jylla

U Myntri Rangbah ka Jylla Meghalaya u Conrad K Sangma hynne ka sngi, ula pyllait ia u synsar uba 1700 metric ton na Khlieh Umsten, Ri Bhoi district ban khaii shabar ka jylla. Ïa une u synsar yn phah sha ka Central Warehousing Corporation ha Guwahati Assam ha kaba yn buh bad die lilam sha ki nongthied synsar kiba thlieh dor heh. Ia kane ka sienjam la shim hapoh jongka CM-ASSURE ka prokram jong ka Sorkar Jylla da ka jingthmu ban kyrshan ia ki nongrep namar ka jinghiar dor u synsar ha ki iew ki hat bad ka scheme ka pynleit jingmut ha ki mar ki mata ki bym pyut bad kiba kham lah ban neh slem bha.

Ha kane ka prokram, u Myntri Rangbah ka Jylla ula aiti ia ki kali Pick-up sha ki nongioh jingmyntoi na ka CM-Elevate. U Myntri Rangbah ula pyntip ba ka Sorkar kala shim ia ki sienjam ban kyntiew ia ka rep ka riang bad na ka bynta ka bha ka miat jong ki nongrep bad ula pyntip ruh ba ka Sorkar ka dang thaw ia ki lad ban wanrah ia ka jinglong jingman kaban pynlah ha kaban kyntiew ia ka jingpynmih ha ka rep ka riang bad ula pynthikna ia kiba donbyntalang kila iatreilang ban iakhun ia ki jingeh.

“Ka Sorkar kan ïatreilang bad ki shnong ki thaw bad ki nongseng kam ban wanrah ïa ka jingkylla ha ka ïoh ka kot ha ki thaiñ nongkyndong lyngba ki rukom rep rukom riang kaba bha tam” ong u Conrad.  Ki sienjam kiba la shim ban kyntiew iaka rep ka riang ki kynthup ia ka CM-ASSURE bad ka CM-Elevate, kaba pyni ia ka jingiengskhem jong ka Sorkar ban kyrshan ia ki nongrep bad ban kyntiew ia ka kam rep kam riang.