200 kilo ka kaiphot Expert Committee Ka sorkar ka dang bishar bad shen kan pyllait paidbah: Conrad

U Myntri Rangbah ka Jylla u Conrad K Sangma hynne ka sngi ula pyntip ba shen ka sorkar kan pyllait paidbah ia ka kaiphod jong ka Expert Committee halor ka bhah thungkam (State Reservation Policy). Ia kane u Conrad ula pynshai halor ka jingdawa u President ka Voice of the People’s Party (VPP) u Bah Ardent Miller Basaiawmoit ba long u MLA ka Nongkrem constituency. Lah ban kdew u Bah Ardent ula byrngem ban iakhih lada ka Sorkar kam pyllait paidbah ia ka kaiphod jong ka Expert Committee halor ka State Reservation Policy.

Haba kren sha ki lad pathai khubor u Conrad ula iathuh ka kaiphod kam duna 4000-5000 sla bad ka khia palat 200 kilo bad ki Ophisar ki donkam ban pule bad bishar bniah ia kawei pa kawei ka sla. U Conrad ula ong, namar ka dei ka mat ba ktah ia ki paidbah ka Jylla, ki Ophisar ha ka jinglamkhmat u Chief Secretary ki donkam ban pule bad bishar bniah bad kim lah ban shu pule tang dep. Ula iathuh ka kaiphod ka long kaba bun bad kaba khia ha kaba ym lah ban kit da ka liengsuin bad ka Sorkar ka hap ban phah da ka kali kyrpang ban kit.

“Namar kata ka lah ban long ba bakla ban shu pynbna ne pyllait paidbah ia ka kaiphod khlem da bishar bniah. Ki Ophisar ki la dang bishar bniah ia ka kaiphod bad shen kin ai sha ka kynhun Myntri Sorkar bad hadien kata ngin sa pyllait paidbah ia ka kaiphod” la ong u Conrad. “Ka dei ka mat ba kongsan, ka jingkylli kam mih ban nym pyllait ia ka kaiphod” u la bynrap.