22 tarik ka jingialang ki Muster Roll ba sangeh siew floor rate & VDA ka sorkar

Na ka daw ba ka sorkar Jylla ka khlem ai jingpynshai da ki jingthoh halor ka jingsangeh siew jong ka ia ka floor rate bad VDA sha ki nongtrei murter roll naduh ka 1 tarik October 2025, wat haba ki la dep pan jingshai na u Commissioner Secretary ka Finance bad na u Myntri Ryngbah duh ka sorkar Jylla, kumta hynne ka sngi ka seng All Jaiñtia Muster Roll Worker and Labour Union haka jingialang shong pyrkhat ha ïungwalieh Chlliangraij Jowai kila rai ban khot pynlong daka dorbar bah haka 22 tarik mynta u bnai ha madan Malki Shillong ha kaba baroh ki nongtrei Muster Roll jongka Jylla naki district bapher bapher kin wan iashim bynta lang ban iatai iakren halor kane ka mat.

Hadien ka jingialang bala donlang ki dkhot nongialam Unit ka AJMR&LU naki block bapher bapher, u nongaibuit ka seng u Khroobok L Pariat u ong ka All Jaiñtia Muster Roll Worker and Labour Union kaba kynthup iaki nongtrei muster roll ka Jylla Meghalaya dei kaba la sdang treikam naduh u snem 2017.Ki la iakren bad ka sorkar ban pynkiew shisien 5 snem iaka floor rate bad ka VDA kaba dei ban pynkiew 2 sien shisnem katkum ka aiñ minimum wages act 1948.Ia kane u ong kila iakhun naduh u snem 2017-2018 bad poi u pud ba kin shah thngan haduh ban da ioh iaka hok.Hynrei mynta pat jong u snem 2025 ka sorkar ka khlem siew shuh naduh ka 1 tarik October 2025.

Bad halor kane u iathuh kila pan jingshai na u Commissioner Secretary ka Finance bad na u Myntri Ryngbah duh ka sorkar Jylla ba lada kin dang pyntrei ne em shuh ia kane ka flow rate kaba dei ban pynkiew ne siew shaki nongtrei muster roll.Shuh shuh u iathuh ba haka jingiakren jongki bad u Labour Commissioner ula shu jubab ktien dei baka sorkar ka lap bala hiar dor ki marbam mardih, hynrei haka jingwad bniah ki dkhot nongtrei muster roll ha baroh ki district ka Jylla pat u ong ki lap ba ki dor marbam ki rem.Kumta u ong naka daw ka jingleh bym suitñiew ka sorkar ban siew iaka floor rate nalor ba kam ai jingpynshai ruh lyngba ki jingthoh kila rai ban lum daka dorbar bah haka 22 tarik ha madan Malki ha Shillong ka ban sdang naduh ka por 10 baje mynstep.Bad u kyrpad ruh ia baroh ki nongtrei Muster na kylleng ki district ka Jylla kynthup naduh Rilum Garo Khasi bad Jaiñtia ban ia wan shitrhem sha katei ka dorbar.