26 tarik yn bishar biang ia ka mukotduma shah pynïap u Raja

Ka jingbishar halor ka mukotduma shah pynïap u nongkhaii uba na Indore, u (Late) Raja Raghuvanshi ka la sdang mynta ka sngi hakhmat ka Iingkashari (Additional Deputy Commissioner (Judicial), Shillong, ha kaba la eksamin ia u nongujor uba dei ruh u hynmen jong u lanot u Vipin Raghuvanshi. Kane ka jingshim bishar jong ka Iingkashari ïa ka mukotduma ka dei hadien ba ki Pulit ki la aiti ïa ka Charge-Sheet ba nyngkong pyrshah ïa 5 ngut ki nongshah kynnoh donkti kynthup ka kurim u Raja, ka Sonam Raghuwanshi bad u samla jong ka u Raj Kushwaha, u Vishal Singh Chauhan, u Aakash Singh Rajput, bad u Anand Kurmi.

Haba kren shaki lad pathai khubor u Special Public Prosecutor, u KC Gautam u la ong ba ki don haduh 90 ngut ki briew kum ki sakhi ba ka Iingkashari kan sngap na baroh arliang bad u la ong ruh ba kane ka kam kan shim por. “La khot tang ia u Vipin Raghuvanshi mynta ka sngi. Kane ka eksamin kam pat biang, kan shim por shuh shuh. Kiwei pat, katba nang wan ka por jong ki, kin sa wan” u la ong. Naka liang u hynmen jong u (Late) Raja Raghuvanshi, u Vipin Raghuvanshi u la ïathuh ba ka Iingkashari kala buh por biang 26 tarik Naiwieng 2025 ban bishar iaki sakhi”.

Lah ban kdew ba haka 28 tarik Raisaw ka Iingkashari ka la thaw ïa ki kyndon aiñ hadien ba la wanrah iaki nongshah kynnoh na District Jail, Shillong, ba la mihkhmat da ki nongïasaid aiñ u S. Rana (Dy. LADC) and P. Pradhan (ALADC).Ka jingmudui ka shaniah ha ka kot mudui kaba don 790 sla ïa kaba la mudui da ki Pulit Sohra kaba ithuh kumba 90 ngut ki sakhi.Lah ban kdew ruh ba u Superintendent of Police (SP) ka East Khasi Hills u Bah Vivek Syiem u la pynthikna baki Pulit ki dang pynkhreh ia ka Charge-Sheet kaba ar bad la khmih lynti ba yn pyndep hapoh u bnai Naiwieng 2025.