3 ngut ki khynnah Khasi ha Karnataka ki don ha ICU

Ka KSU Bengaluru Unit ka la leit jngoh ban ai mynsiem ia ki khynnah Khasi ba ioh pang na ka jingbam ba sniew ha Karnataka kiba don mynta ha ka jingshah sumar ha ka hospital. U President ka KSU Bengaluru Unit u bah Donboklang Nongphud ula pyntip ha ki sngi ba la dep, ka jylla Karnataka ka la mad ka jingjia ba sngewsih ba ki khynnah pule na ka skul Gokula Vidya Samsthe ha Malavalli, Mandya District, ki la ioh pang na ki jingbam ba sniew ha Hostel.

Ula ong ki ar ngut ki khynnah pule na Meghalaya ba la tip kyrteng u Khrehlang Khongtani na ka shnong Lyndem bad u Name Bantei Marwein na ka shnong Lawse ki la khlad noh. La iathuh kumba 120 ngut ki khynnah ki la ioh pang hadien ba la bam ha kawei ka hotel ha Malavalli kynthup 40 ngut ki khynnah skul ka Gokula Vidya Samsthe bad 24 ngut ki khynnah skul na Meghalaya. U bah Donboklang ula ong, ki khynnah ba pang ki dang don ha ka jaka sumar ha Mandya Institute of Medical Sciences katba 3 ngut ki dang shah sumar hapoh ICU bad kiwei pat ki khynnah ki la kham khlain.

U la bynrap ki dkhot ka KSU Bangalore Unit man ka sngi ki leit ban peit ia ki khynnah Khasi ba thiah pang bad ha ka jingiasyllok bad ki doctor ka hospital, la ioh jingtip ba kim pat long ban ai kino kino ki jingbam ia kine ki khynnah, hynrei tang ka um snep kor bad kumta ki dkhot ka seng ki la leit thied ia ka um snep kor ban ai sha kitei ki khynnah Khasi ba thiah pang.