3 sngi ai por ban kynriah ki nongdie madan na 9lad ha ki jaka la pynkhreh ka sorkar

Ka ophis jong ka Shillong Municipal Board ka la pynmih ia ka hukum ba baroh ki nongdie madan ba shong dukan ha shilynter ka Khyndailad ki dei ban kynriah noh ia ki dukan jong ki hapoh lai sngi, sha ka jaka ba la pynkhreh ka sorkar.  Ha ka jingpynbna u Chairperson ka Town Vending Committee & Chief Executive Officer, Shillong Municipal Board, Shillong, ula ong ba kane ka jingai por lai sngi ia ki nongdie madan kan long naduh ba pynmih ia kane ka jingpynbna mynta ka sngi ka 21 tarik Jylliew, 2025. Halor ka jingai jingmut ka Town Vending Committee ha kaba iadei bad ka thain Khyndai Lad, ka sorkar jylla ka la pynbna ia ka Mala hajrong ka MUDA ha Khyndai Lad kum ka jaka die madan.

Ka sorkar ka la pynbna ruh ba ia ka bynta jong ka Khyndai Lad, kum ka No Vending Zone, kaba mut ym shah shuh ban die madan.U Chairperson ka Town Vending Committee ula ong ba ka Town Vending Committee ka la ai ia ka Certificate of Vending (CoV) sha baroh ki nongdie madan kiba la ithuh naduh ka 2 tarik haduh 19 tarik Jylliew 2025, hadien ba la bud ryntih katkum ka Meghalaya Street Vendors (Protection of Livelihood and Regulation of Street Vending) Scheme 2023 ryngkat ka Street Vendors (Protection of Livelihood and Regulation of Street Vending) Act 2024.

Katkum ka Meghalaya Street Vendors (Protection of Livelihood and Regulation of Street Vending) Scheme 2023, baroh ki nongdie madan kiba don ka syrnod ba la ithuh ka sorkar, ki dei ban kynriah noh sha jaka kaba la bthah ka sorkar kumba la kdew ha ka syrnod CoV jongki naduh ka 22 tarik Naitung 2025. U Chairperson ka Town Vending Committee & Chief Executive Officer, Shillong Municipal Board, Shillong, ula ong ba kito kiba la ioh ia ka syrnod CoV ne Certificate of Vending, kiba die madan ha ka thain Khyndai Lad, ki dei ban mih noh mardor sha ka jaka ba la pynbiang ka sorkar hapoh lai sngi.