5 snem pynjlan ia ka skhim PMAY-G, phah sorjamin biang ka sorkar Jylla

U Myntri Rangbah ka Jylla u Conrad K Sangma mynta ka sngi, ula pyntip ba ka sorkar ka la pynkhreh ban leh sorjamin biang halor ka Pradhan Mantri Awaas Yojana-Gramin (PMAY-G). Kane ka dei ka sienjam ba kongsan hadien ba dep shna ia ka map ‘Surveyor’ ha man la ki shnong ban pyniasoh ha kaba pynlong ia ka jingjurip thymmai ia ka thup Awaas+2018 ban pynthikna ka jingpynrung kyrteng ia baroh ki longiing bad ki shnong ba dei hok kiba la shah iehnoh ha ka jingjurip ba la dep.Kane ka jingpyrshang ka la wan hadien ba ka MoRD, Rural Housing Division ka la pynjlan ïa ka PMAY-G sa 5 snem haduh u snem 2028-29 bad ka Meghalaya ka la pyndep lut ïa baroh ki thong mynshwa kan long napdeng ki katto katne kiba nyngkong eh ha kaba yn sdang biang ïa ki jingjurip. Naduh ba la sdang pyntreikam ïa ka PMAY-G ha u snem 2016, ka Meghalaya ka la mang ïa ki 186,283 tylli ki ïing, kiba la biang pura kat kum ka thong jong ka survey Awaa+2018 bad haduh mynta, ki iing kiba la dep ban shna ki long 113,158 tylli (60.75%), bad kiba sah ki dang don hapoh ki kyrdan bapher bapher jong ka jingtei bad ka Jylla ka thmu ban pyndep lut ïa baroh ki ïing kiba dang sahteng hapoh u bnai Jymmang 2025.

Ka Jylla lyngba ka State Rural Employment Society (SRES) kaba pyntrei ia ka kam hapoh jongka tnad C&RD ka la shna ia ka map ia ki 6,354 ki nongleh sorjamin ha ki 6,426 tylli ki shnong ban pynthymmai ia ka jingtip jong ka Awaas+ da kaba pyndonkam ia ki kyndon ba la pynkylla thymmai. Ka long kaba donkam ia baroh kiban ioh jingmyntoi ban pynbiang ia ki kot ki sla kiba donkam kum ka Aadhaar Card, ka MGNREGA Job Card, ki jingtip ba bniah ha ka Bank account, u Swachh Bharat Mission (SBM) number, ka Voter ID bad ka syrnot jaidbynriew, ka Affidavit kaba pynbna ba ym don iala ka jong ka iing.Da ka jingmaitphang ka PMAY-G, kumta ka Sorkar Meghalaya ka pyndonkam ïa ka Housing Mission ka jongka ban weng ïa ki jingshah pynduh hok ha ki thaiñ nongkyndong da kaba ïatreilang bad kiwei pat ki skhim kiba don jingïadei, ban thaw ïa ka lad ban ïoh ïa ki jingshakri kiba kongsan kum ha ka pule puthi, ka koit ka khiah, ka um kaba khuid, ka jingkhuid jingsuba bad kiwei kiwei ki jingdonkam ba kongsan, ban pynthikna ba uwei pa uwei u nongshong shnong yn lah ban im ka jingim kaba don burom.

Ryngkat bad ka PMAY-G, yn pyniar ia kiwei pat ki jingai jingmyntoi sha ki nongioh jingmyntoi na ka PMAY-G da kaba iatreilang bad kiwei pat ki skhim sorkar ban pynthikna ia ka jingkyrshan kaba pura ia ki nongioh jingmyntoi. Lyngba ka MGNREGA, ka Swacch Bharat Mission, ka Pradhan Mantri Ujjwala Yojana, ka Deen Dayal Upadhyaya Gram Jyoti Jojana, ka Jal Jeevan Mission, ka Mission ka ai ia ki jingmyntoi ba pura, kynthup ia ka ioh kam ioh jam, ka jingkhuid jingsuba, ka bor ding kaba khuid, bad ka bording ilektrik. “Baroh ki jingpyrshang dei ban pyniaid shakhmat da baroh kiba donbyntalang ban pynthikna ba ym don mano mano ruh kiba shah ieh shadien ha ka jingjurip”, la ong u Myntri Rangbah bad ka kyntu ia baroh kiba dei ban ioh jingmyntoi ba kidei ban pynbiang ia la ki kot ki sla kiba kongsan bad ban iashimbynta ha ka jing sorjamin kaban sa sdang noh bad ula kyntu ruh ia baroh ki kynhun ha ki shnong kynthup ia ki VEC, VDC, VO, SHG ban iahsimbynta lang ha ka tei ka kam khnang bay n ym don mano mano ruh kiban shah iehnoh shadien.