50 ki bos ilektrik yn thied ka Meghalaya, ka thong ban pynkylla ha 2027

Ka Meghalaya Urban Development Authority (MUDA) ka la phah order ban thied 50 tylli ki bos ilektrik na ka kompeni Ernst & Young LLP ban pyniaid ha Sor Shillong. Ia kane la iathuh da u Vice President ka kompeni Ernst & Young LLP u Shobhit Saxena. U Saxena ula iathuh ba kine ki 50 tylli ki bos ilektrik la phah order da ka MUDA ki lah ban poi hadien 6 ne 7 bnai. Ha kajuh ka por u Saxena ula pynpaw ba u ai ka jinkyrshan ia ka tnad transport, Meghalaya kaba la pynlong ia ka jingsurbe ia ki lad ki lynti ban pyniaid da ki kali ilektrik bad ban buh ia ki charging station ha kylleng ki jaka ha Shillong.

U Saxena ula ong ba ynda la pyniaid da ki kali ilektrik ha Meghalaya, ka jylla kan long kaba itynnad bha ha kaba ka ri ka la buh thong ban pynkylla kali ilektrik ia ki kali baroh ha 2027.Ula ong ba ka sor Shillong ka iahap bha ban kamai da ki kali ilektrik namar ba kan pynduna ia ka jinglut jingsep bad kan wanrah ia ka jingkhuid.“Ka kompeni ka ai jingkyrshan ia ka tnad pyniaid kali ha sor Shillong ban pyniaid da ki kali ilektrik bad ban buh ia ki charging station ha kylleng ki jaka ha Shillong,” ula ong.

Katkum ka jingong u Saxena, la dep jied 24 tylli ki jaka ban buh ia ki charging station ha nongbah ia ki kali rit bad ki bos ruh. Ki jaka ban buh ia ki charging Station ki long ha jaka ieng kali ka Municipal, ha ki hotel, ha ki shopping complex bad la ai jingmut ban pyntreikam ruh da ka Public Private Partnership (PPP) Mode ban buh ia kine ki jaka pynbam ilektrik ia ki kali ne charging station. Ula ong ba ka donkam ban pynkylla kali ilektrik ia ki kali kum ki bos, ki ar shaka, ki saw shaka ruh.