80% ki skul hapoh ka Jylla Ki don ka kper ban hikai rep ia ki khynnah

Haduh 80% ki skul hapoh Meghalaya ki la don ia la ki kper ne ki School Nutrition Garden ban thung jhur na ka bynta ban ai bam ia la ki khynnah skul. Ka jingpyntreikam ia ki kper jhur lane ki School Nutrition Garden ka dei katkum ki kyndon jong ka skhim Sorkar Pdeng ka PM Poshon kaba bei tyngka ban ai bam ia ki khynnah skul naduh ki Pre-Primary Class I haduh Class VIII. Haba pyntip ïa kane u Director ka Directorate of School Education and Literacy (DSEL) u Swapnil Tembe ula ong, ba ka thong jong ki School Nutrition Garden ka dei ban hikai ia ki khynnah halor ka jingmyntoi ban rep hi ia la ki jhur bad kumno ban bam da ki jhur ba tei met.U Swapnil ula ong, ba ka jingdon ki School Nutrition Gardens kan hikai ia ki khynnah skul, khamtam haba ia dei bad ka khuid ka suba, ka jingnang ban pyndonkam ia ki mar ba pyut ban pyndonkam kum ki sboh haba thuhg jingthung ha la ki kper.

“Ha ki snem ba la dep ka Meghalaya ka don tang 9% ki skul ba pyntreikam ia ki kper lane ki School Nutrition Gardens hynrei mynta u snem ka la kiew sha ka 80% bad ngi buh thong ban kot sha ka 100%” la ong u Tembe. U Tembe ula ïathuh dang shen ka tnat pule puthi ka la pynmih ia ka Calender bad katkum kane ka Calendar la mang 1 sngi kum ka (Bag Less Day) bad ha kane ka sngi ki khynnah skul, kin nym pule na ki kot hynrei kin shah hikai kumno ban rep jhur bad kiwei ha la ki kper ba don hapoh skul. Ula ïathuh ka tnat Horticulture lyngba ki Krishi Vigyan Kendra (KVKs) ki don bynta ban hikai ia ki ia ki khynnah, halor ka rep ka riang ha ki kper ha phyllaw jong ki skul.

“Kawei ka nuksa ba kiwei ki skul hapoh ka Jylla ki lah ban shim ka dei na kawei ka skul kaba don ha Sohra, ha kaba ki kmie ki kpa jong ki khynnah skul, ki wan sha ki skul ban shim bynta ha ka rep ka riang, ki hikai ia la ki khun ban tih ia la ki kper ban ker siej bad kiwei kiwei” u la ong.