90 ngut kiba la dep pyntbit kum Dy SP, SI bad ASI

Ka North Eastern Police Academy (NEPA) hynne ka sngi, kala pynlong ia ka Passing Out Parade ha kaba 90 ngut ki pulit na kylleng ka thain shatei lam mihngi, kila pyndep ia ka jingpyntbit ialade kum ki pulit ha ka kyrdan Deputy Superintendents of Police (Dy SP), Inspectors, Sub-Inspector (SI) bad Assistant Sub-Inspectors (ASI). Kine ki pulit kiba la pyndep ia ka jinghikai ne training ki kynthup ia ki 27 ngut ki Dy SP Probationer, 2 ngut ki Inspectors, 56 ngut ki SI bad 5 ngut ki ASI kiba na ka jylla Meghalaya, Manipur, Assam bad Nagaland. Ia ka parade la ialam da u DySP Probationer D. Theingam Thangal jong ka Manipur Police Service, ha kaba la pyni iaka jinglong ryntih bad jingioh iaka jinghikai kaba eh na ka NEPA bad ia kane ka Dikshant Parade la khmih bniah da u Myntri Rangbah ka jylla Meghalaya u Conrad K. Sangma. Katba u Director ka NEPA u Danesh Rana, ula pyntian smai ia kitei ki 90 ngut ki ophisar pulit kiba la pyndep ia ka jingioh jinghikai kaba la sdang naduh ka 4 tarik u Nohprah 2023.

Ha kane ka jingialang la ia donlang ki heh ophisar na ka jylla Assam bad Meghalaya, ki nongshah khot kyrpang, ki bahaiing bahasem jong ki pulit kiba la pyndep ia ka training ryngkat, ki nongtrei jong ka NEPA bad kiba ioh jinghikai ha ka Explosives and Bomb Disposal Course bad ka Training of Trainers (ToT) program halor ka Disaster Management. Ha kane ka jingialang la pyni ruh iaka jingiengskhem bad iaka jingtbit jong ka NEPA ha kaban pynmih ia ki ophisar kiba tbit kiba kloi ban shakri ia ka imlang sahlang bad ban pynkhlain ia ki bor aiñ ha ka thaiñ. U Conrad Sangma haba kren ha ka jingialang, ula iaroh ia ka jingnoh synniang jong ka NEPA ha kine ki 46 snem kiba la leit noh, ha kaba kala ai jinghikai pyntbit ia palat 36,088 ngut ki pulit.

Ula banjur ia ka jingkordor ban long kiba sngewrit ha ka kam pulit bad ula kyntu ia kine kiba la pyndep ia ka training ban shakri naduh mynsiem bad ban sngewthuh ia ka jingsngew jong kiwei. “Mynta haba phi lah ioh ia ka kyrdan ban bat ia ka bor, phi dei ban iai kynmaw ia ka jingkongsan ban long kiba sngewrit. Ieng ha ka nongrim, shakri da ka jingaiti bad iengskhem ha ka jingshisha ia ka jingkitkhlieh kaba la pynkhamti ha phi” la kyntu u Conrad.