Katkum ka NEP ki nonghikai dei ban nang Kompiwtar

Ka kynhun ki nonghikai Upper Primary hapoh ka shatri All Meghalaya Govt Upper Primary School Teachers Association (MUPSTA) hynnin ka sngi ki la pynlong ia ka jingialang ba phra ne ka 8th Annual General Meeting ha Jowai, West Jaiñtia Hills District ha Community Hall Lion Mission Compound.

Ha kane ka jingialang la wan iashim bynta lang da ki para nonghikai na kylleng ka Jylla Meghalaya ba kynthup na Garo, Khasi bad Jaiñtia.

Ha kane ka jingiakynduhlang ki la iamir jingmut halor ka jingiaid lynti ka seng kumjuh ki jingeh ba ki mad ba iadei bad ka tulop katkum ka Meghalaya School Service Rules, (MSSR) 2025, haba iadei bad ka Modified Assured Career Progression Scheme (MACPS) ba napdeng ki pra nonghikai don kiba ioh don pat ki bym ioh, ka dual charge allowance naduh u snem 2017 la dei ban ioh 10% ka basic na kaba juh ioh mynshwa 5%, hynrei pynbna don ki nonghikai ba la peit lang ia ka kam ki headteacher da 10 bnai don kiba haduh 3 snem ruh ki ioh allowance tang 3%.

Nangta kila iakren ruh haba iadei bad ki jingeh ban pyndep iaki course jinghikai naka bynta ki khynnah skul haba ki nonghikai kynthei ki ioh khyllung bad haba ki nonghikai ki ioh jingpang namar bym shym la ai nonghikai ban leit shipor haka jaka jongki.

Bad ruh ki la bynniaw halor ka jingbthah ka sorkar ia ki ban leh shibun kiei kiei la ha skul ne shabar hynrei ka khlem pynbiang pat ia ki jingdonkam ban leh.

Hadien ka jingialang na ka liang ka General Secretary AMGUPSTA kong Philomina Dkhar haba iathuh ia ki jingeh ba ki mad, ka ong ruh ba kila wad jingtip naka tnat education kaba la jubab ba kan peit bniah ia kane.

La ong kaba ki kham bynniaw tam eh haba ia dei ba para nonghikai kiba dei na kajuh ka tnat ruh la pynhap pat iaki hala ki jong ki kyndon.

Halor kine ki jingeh i kong Philomina i ong, ba ki la dep ruh ban ai jingthoh shaka tnat directorate ka pule puthi, sha u commissioner bad ruh sha u myntri ka pule puthi u bha Lahkmen Rymbui.

Haba phai sha ka MSSR 2025 ka general secretary ka ong, ki nonghikai ha kane ka kam ki ioh jingsiew katkum ka Pay Level 5, ha ki snem ba la leit kane ka jingsiew ka dei ka jingkhot thung kam ia kito ba la pass ia ka matrix, katba mynta pat la khot da kiba la pass class 12 ha ryngkat ka jingpyndep ia ka D.EL.Ed and MTET hynrei ki nonghikai pat ki dang ioh ia ka jingsiew pay level 5 hi.

Bad ban pynkiew ia ki na ka pay level 5 sha ka pay level 6 ruh ka shim por haduh 10 years.

Ki ong ba lada nujor bad ki nongtrei LD ha kiwei pat ki tnat treikam sorkar kiba ioh kumjuh hi ka pay level 5 katkum ka criteria class 12 kine ki ioh promotion tang hadien 7.

Ki la ai nuksa ruh ia kiba trei hapoh secretariat ba iahap kumjuh hi ka kyrdan, khamtam ki nonghikai ba nalor ka kyrdan Graduate ki hap pass sa ia ka D.EL.Ed ha ki Upper Primary ha kaba ban ioh iaka pay level 9 ki hap ban trei 10 snem, katba ha secretariat ki dei pay level 8 bad naka bynta ka pay level 11 kin ioh tang hadien 4 snem ba ki trei.

Haba phai sha ki khynnah ki ong, la bthah ba dei ban leh ne bud katkum ka National Education Policy ha kaba ki donkam ruh ban tip ia ki kor computer hynrei kine kim don ha ki skul, nangta la ong haba ki phai sha ki skul ruh don bun ki bym shym la shna pynbha shuh la 12, 15 snem.

Shuh shuh la ong ba iaki nonghikai la phah iaki shibun ki jait kam ban leh, hynrei kim shym la ioh pat iaki jingdonkam ban leh, watla katta ruh ki iai ialeh hi ban pyndep iaki kam ba ka sorkar ka phah lada dei ka UDISE, ka Poshan bad kiwei.