Shim bynta ki heh NPP ha ka jingrakhe dap 12 snem ka NDA, kyrmen ban iai bteng ki kam pyntoi ha

Ki nongialam jong ki seng saiñ pyrthei ki bapher bapher hapoh ka ri India kiba iatreilang hapoh jong ka kynhun National Democratic Alliance (NDA) kaba ialam ia ka Sorkar Pdeng kila ai ka jingiaroh ia u Myntri Rangbah duh ka ri u Narendra Modi halor ka jingdap 12 snem ka jingsynshar ka sorkar NDA hapoh ka jingialam ka seng BJP.

Ki nongialam ka seng NPP kynthup u Myntri Rangbah ka Jylla u Conrad Sangma uba long ruh u National President ka NPP bad u Symbud Myntri Rangbah ka Jylla u Bah Prestone Tynsong ki la iashim bynta ha katei ka jingialang bad ki la ai khublei bad kitbok kitrwiang halor ka jingdap 12 snem ka jingshakri ka Sorkar NDA hapoh ka jingialam u Myntri Rangbahduh ka ri u Narendra Modi ia ka ri India baroh kawei.

Ki la pynpaw ka jingkyrmen skhem ba ka Sorkar NDA ha kine ki 2-3 snem kan iai bteng ban kyntiew ia ka roi ka par bad ka ioh ka kot ha ka jylla Meghalaya bad ha ka thaiñ shatei lammihngi bad ban pynurlong ia ki jingangnud jong ki paitbah ka Meghalaya.

Ki nongialam ba la iashim bynta ha ka jingialang ka NDA ha Bharat Mandapam ha New Delhi, ka dei kum shibynta jong ka jingrakhe ia ka jingdap 12 snem ka jingshakri ka Sorkar NDA, ki la ai khublei kyrpang ia u Narendra Modi ban kylla long uba nyngkong eh ha ka ri kum u Myntri Rangbah duh ka ri ban ialam ia ka sorkar pdeng haduh 12 snem lynter naduh u bnai Jymmang 2014 haduh mynta.

Ha kane ka jingialang, baroh ki nongialam ba radbah jong ka NDA ki la wan ban iashim bynta kynthup ia ki Myntri Rangbah, ki Symbud Myntri Rangbah na ki 22 tylli ki Jylla bad Union Territory kiba iatreilang bad ka NDA.

Kane ka jingialang ka la phaikhmat halor ia ki mat ba kongsan ban kyntiew ia ka roi ka par bad ia ka ioh ka kot ka ri bad ia ka lynti iaid kaba la shim da ka sorkar NDA ban pynkylla ia ka ri India kum ka ri kaba la kiew shaphrang bha hapoh u snem 2047.