Pynshlur ka kong Ampareen ia ki samla ban iakhun eksam UPSC, ban pyniaid hi da ki ophisar ia ka Jylla

Ka Industries and Trade Fair Association of Assam (ITFAA) hynne ka sngi ka la pyllong ia ka Meghalaya UPSC Vision Conclave, 2026 ban ia phylliew jingmut bad iathir halor ki jingeh ba khanglad ia ki khynnah ka jylla ban pass ia ka eksam UPSC.

Haba kren ha kane ka sngi ka MLA ka NPP ba dei ruh ka Nongaibuit ka sorkar jylla, ka la ong ba ka sorkar ka sngewkhia halor ka jingduna ki ophisar ban pas ia ka UPSC khamtam ki briew kiba dei ki trai ri ka jylla.

Ka kong Ampareen ka la ong, ba ka long kaba donkam bha ban pynshlur ia ki samla ka jylla ba kin pas ia kane ka eksam jong ka UPSC, khang ban pyntikna ba ka lawei ka jylla Meghalaya yn lah ban pyniaid hi da ki ophisar ka jylla.

“ Ngi sngewthuh bha bad ngi la iohi ia ka jingdonkam ban pynshlur ia ki samla ka jylla Meghalaya ban pas ia ka exam UPSC namar ngi dei ka jaidbynriew ba rit paid, ngi don ki jingsyier haba iadei bad ka lawei. Namarkata lada ngi don ki ophisar ha ka kyrdan UPSC kiba dei ki nongshong shnong ka thain jong ka jylla, ban pynshai bad pynsngewthuh ia ki jingtip ban iatreilang ban kyntiew ia ka bha ka miat jong ki paidbah ka jylla, kan pynlong ia ka kam kaba suk tam ban leh,” ka la ong.

Ha kajuh ka por ka la pynpaw ka jingsngewkmen ba ka International Trade Fair Association ka la lah ban pyllong ia kane ka prokram ha kaba la iohi ba ki don bun ki samla pule hi ki la wan ban shim bynta bad ki don ka jingthrang ban kwah ban tip kumno bad kaei ka lynti ne ka ‘Magic Mantra’ ban pas ia ka exam UPSC.

“Watla ka jylla kam pat lah ban don la ka jong ka shlem pule ban iarap ia ki samla ban pynkhreh ia lade na ka bynta ka exam UPSC. La kyrmen ba shen kin sa mih ki khynnah kiban pas ia kane ka eksam,” ong ka kong Ampareen.

Katba na ka liang u General Secretary ka KSU u samla Reuben Naijar ula ong ba kane ka Conclave ka long ban iaphylliew jingmut kumno ban kyntiew ia ki samla pule ban long kiba pynkhreh ialade na bynta ka UPSC.

Ula ong ba la iakren sani halor kiei ki lad ki lynti ban ki jingiarap kum ki scholarship ba ka orkar ka lah ban ai ia ki khynnah.

Ula ong ba na ka liang ka seng ruh ka ju phah ia ki khynnah pule ban pynkhreh ban pyntbit ialade sha Delhi na bynta ka eksam bad kane kan dei ka sen ba lai ba ka seng kan sa phah biang ia ki khynnah ha kine ki khyndiat sngi.

“ Na ki khynnah ba ngi phah don katto katne ngut ki samla kiba la pas ia ka MCS ha kine ki snem ba ladep bad don ruh kila pas ia ka eksam bapher bapher.Watla ngim pat ioh ia u soh jong ka UPSC hynrei ngi tip ba ka UPSC kadei ka eksam kaba eh bad kyrmen ba ha kine ki sngi ban wan, ba lehse kin sa pas,” ula ong.

Ula pynpaw ia ka jingsngewkhia namar ba kumba long mynta ym don ia ki Coaching Centre ha jylla. “ Ban pas ia ka Civil Service Exam khlem kano kano ka jingiarap ka long kaba eh. Ha jylla mynta ngi don tang ka Meghalaya Administrative Training Institute (MATI), hynrei kane ruh ym pat don ia ki nonghikai kiba lah ban hikai ia ki khynnah ha ki sobjek bapher bapher bad ki bunkam ruh ban ai jinghikai ia ki ophisar sorkar ka jylla. Ngi kwah ia ki jaka hikai ban ai ka jinghikai ba pura ia ki khynnah,” ong u samla Reuben.