Bthah ki tnad Tnad Traffic ia ki taksi bad Auto Rickshaw kamai ban tah ‘Sticker’

Ka Tnad Traffic jong ka East Khasi Hills hynne ka sngi, ka la bthah ia ki trai taksi kamai bad Auto Rickshaw ba ki dei ban aplai ban ia ka ‘Sticker’ bad ‘Number’ ban tah ha ki kali kamai ha East Khasi Hills.
Katkum ka jingpynbna u Superintendent of Police (Traffic) ka East Khasi Hills, u Dr. Hari Prasanth M. R. ula pyntip ba ka ophis kan sa ai ia ki ‘Sticker’ ryngkat bad u nombar na ka bynta ki taksi kamai bad Auto Rickshaw kiba kamai hapoh East Khasi Hills, ha kaba kin hap ban siew ia ka T.150 na ka bynta kawei ka ‘Sticker’.
Katei kan treikam naduh ka 7 tarik u Nailur haduh ka 6 tarik u Naiwieng 2026 bad hadien katei yn dain kuna ia ka Late Fee T.500 ne kum ka jingslem na ki trai kali, nongmihkhmat jong ki taksi kamai bad Auto Rickshaw.
U SP Traffic ula bthah ia ki trai kali bad nongmihkhmat ba kin pynbiang ia ki kot ki sla kiba lah dep pynthymmai (original) bad ki kot ki sla kiba la dep ban shon biang (Photocopy) ban ioh pdiang ia ki ‘Sticker’ bad ia ki kot ki sla na ka bynta katei yn sa buh noh kum ki rekod.
Ula pynpaw ba ki kot ki sla kiba hap ban pynbiang ki kynthup ia ka Registration Certificate, Permit, Insurance Certificate, Fitness Certificate, ka Trading License na ka bynta ki trai kali ki bym dei ki riewlum, ka Professional Tax, Passenger Tax, M.L.M.T.U Certificate, Pollution Certificate bad ia ka EPIC/AADHAR ne kino kino ki ID ban pynshisha ia kiba iohpdiang.
Hadien ba la pyndep ia ka jingkhmih bniah ia ki kot ki sla bad ynda la shem ba kila biang lut, kumta yn sa aiti ia ka ‘Sticker’ bad la bthah ba dei ban tah ha ka bynta ba shakhmat jong ka liang kadiang jong ka kali.