Aiti u bah John ïa ki Article 338 bad 338A ha u MP Rajya Sabha ban pynbeit

U Co-Chairman jong ka Meghalaya State Planning Board bad Chairman ka Grand Council of Chiefs of Meghalaya, u Bah John F. Kharshiing ha ka sngi saitjain ula aiti ha u MP Rajya Sabha ka Jylla u James P.K. Sangma, ban kyrpad ban buddien ïa ka jingdawa kaba la slem bha ban pynbeit ïa ki Article 338 bad 338A jong ka Riti Synshar ka Ri India.
Ka dorkhas, u Bah John ula pynpaw ba ïa ki jingtyrwa bad ki jingthoh kiba la phah da ki kynhun bad ki nongmihkhmat jong ki paid Riewlum naduh u snem 2010 – 2015, ban pynlong ïa ka rukom treikam kaba don ka por kaba shai bad kaba la buh pud, khnang ba ki kaiphod jong ka National Commission for Scheduled Tribes (NCST) kin lah ban pynpoi bad buh hakhmat jong ka Parliament ryngkat bad ki Action Taken Report.
U Bah John F. Kharshiing
u la pynpaw ruh shaphang ki jingialang bad ki jingaiti ia ki jingthoh naduh u snem 2010 – 2015, kynthup ïa ki jingïakren bad u Myntri ka Sorkar Pdeng uba khmih ia ka Ministry of Tribal Affairs ka Sorkar India bad bad u Chairman jong ka Parliamentary Standing Committee on the Welfare of Scheduled Castes and Scheduled Tribes ha katei ka por. Hynrei haduh mynta ym pat don ka sienjam kaba treikam ban pynbeit ïa ki kyndon Article 338 bad 338A ban buh ïa ka por kaba shai na ka bynta ban buh ïa ki ‘Report’ halor ka jinglong jingman jong ki SC bad ki ST hakhmat ka Parliament.
U la pyntip ruh ba ha ka ‘Petition’ la pynpaw ïa ka jingdon jong ka Article 338A, khamtam ka jingkitkhlieh ban pynpoi ïa ki Report jong ka NCST kiba la aiti sha u President bad Parliament ryngkat bad ka dorkhas kaba pynshai ïa ka “action taken or proposed to be taken” halor ki jingai jingmut jong ka Commission.
U Bah John ula pynpaw ia ka jingsngewkhia ba bun ki Report jong ka NCST kidei ki bym pat wanrah ha ka ïing dorbar jongka Lok Sabha bad Rajya Sabha bad kala pynmih ïa ka jingkylli kaba khraw halor ka jingkitkhlieh, ka jingpynshai paidbah bad ka jingtreikam hok jong ki bor jong ka riti synshar kiba la ai na ka bynta ki Scheduled Tribes.
Ula pynpaw ba kane ka mat, kam dei tang ka mat jong ka Meghalaya, hynrei ka dei ka mat kaba kongsan na bynta baroh ki Scheduled Tribes ne ki riewlum jong ka Ri India. Ka jingbym don ka por kaba la buh lypa na ka bynta ban buh ïa ki Report jong ka NCST ha Parliament ka lah ban pynjem ne pynrit ïa ka jingtreikam jong ka rukom jingkitkhlieh kaba la thmu da ka Article 338A.
Ula pyntip ba na ka liang jongu James P.K. Sangma ula kular ïa u ba un wad ïa ki jingtip bad ka jinglong-jingman jong kane ka mat bad un sa ai ia ki jingpyntip, da kaba pdiang ba kane kadei ka mat kaba donkam bad kaba ktah ïa ki hok jong ki paid riewlum ne Scheduled Tribes ha baroh ka Ri.