Ïakynduh ka HNYF ïa u DC Ri bhoi halor ki jingeh ki khynnah skul

Ka HNYF Nongpoh Circle haka sngi nyngkong ka la leit ban ïakynduh ïa u Deputy Commissioner ka Ri-Bhoi, u Dr. Abhishek Saini, ban pynpaw ïa ki jingeh kiba ïakynduh ki khynnah skul kiba hap ban ïaid lyngba ka National Highway-6 ha ka shnong Pahamrioh.

Ha kane ka jingïakynduh la lamkhmat da u samla Birbor Khongbeh, General Secretary ka HNYF Nongpoh Circle, ryngkat bad u samla Ronald Tangsang, Finance Secretary, u Bah Stephan Kshiar, Adviser bad u samla Kitbok Khongdup kum u dkhot.

Haba kren sha ki lad pathai khubor, u samla Birbor Khongbeh u la pynpaw ïa ka jingbym shngaiñ jong ka jinglong jingman jong u surokbah ha Pahamrioh namar ka jingbym don ka lynti ïaid kjat, kaba la buh jingma khamtam ïa ki khynnah skul kiba hap ban pyndonkam ïa katei ka surok ha ka por leit bad wan skul.

U la ong ba namar ka jingbym don jong ka jaka ïaid kjat kaba shngaiñ, ki khynnah skul ki hap ban ïaid ha syndah jong ka surokbah. Ha ki por leit skul bad wai skul, ki khynnah ki ju hap ban mareh ne pynsted ban ïaid na katei ka bynta jong ka surok namar ka jingbun bad jingpynher sted jong ki kali, kaba lah ban wanrah ïa ka jingma kaba khraw ïa ka jingim jong ki.

Kumta, ka HNYF Nongpoh Circle ka la kyntu ïa u Deputy Commissioner ka Ri-Bhoi ban shimkhia bad ban bthah ïa ka National Highways Authority of India (NHAI) ban wanra da ki lad jingïada kiba donkam, khamtam ban tap noh ïa ki nala kiba don ha ki bynta ba ïaid ki khynnah skul, khnang ba kin lah ban pyndonkam ïa ki kum ka jaka ïaid kjat kaba shngaiñ.

U samla Birbor Khongbeh u la ïathuh ruh ba ha kane ka jingïakynduh, u Deputy Commissioner ka Ri-Bhoi u la kular ban shimkhia ïa kane ka bynta bad ban peit bniah ïa ka jingeh kaba la pynpaw da ka seng.

Ha kajuh ka por, ka HNYF Nongpoh Circle ka la kyntu ïa ki bor sorkar bad khamtam ïa ka NHAI ban shimkhia mardor ïa kane ka bynta, khnang ban pynbiang ïa ka jaka ïaid kjat kaba shngaiñ bad ban ïada ïa ki khynnah skul na ka jingma kaba lah ban mih na ka jingpyndonkam ïa ka National Highway-6.