Bthah ka sorkar ban pynrung kyrteng ia ki khynnah skul ha ka APAAR

Ka tnad pule puthi ka jylla ka la kyntu ia ki skul ba kin pynsted ban pynrung kyrteng ia ki khynnah skul ha ka APAAR (Automated Permanent Academic Account Registry) ID, kaba dei ka jingithuh lyngba ka kor Digital ban buh ryntih ia ki rekod bad ban pynjanai ia ka rukom treikam. Ia kane la bthah da u Commissioner bad Secretary ka tnad Education u Vijay Mantri hadien ba ula dep ban lum ia ka jingialang bad ki ophisar jong ka tnad pule puthi. Ka APAAR ID, ka dei ka jingithuh lyngba ka kor Digital kaba don 12 tylli ki nombar bad la pynwandur ban pynneh ia ki rekod pule naduh klas A rit haduh klas XII shaneng. U Director ka School Education & Literacy u Swapnil Tembe, ula kubur ia ka jingsuki jong katei ka sienjam bad ula ong, ba ki dang shu sdang bad ka jingpyntreikam ka dang kynjoh tang 1-2 percent bad la bthah ia ki skul ba kin pynkloi noh ia kane ka jingpynrung kyrteng.

U Swapnil Tembe ula ong “Baroh ki khynnah pule ha ka Ri kidei ban don ia u APAAR ID, u ban neh beit bad wat haduh ka por ba ki pule ha ki college. Ia kane ka ID yn sa donkam ha ka por ba ki khynnah ki kynriah ia ka jaka pule na kawei ka jaka pule sha kawei pat bad ki skul ki hap ban shim ia ka jingkitkhlieh ban shimkhia ban phah lyngba ka  Unified District Information System for Education Plus (UDISE+)”. U Tembe ula ban jur ruh ba kane ka rukom treikam ka dei kaba la iaid lyngba ki jingkhmih bad ki jingpyrshang ki bapher bad ka long kaba kongsan ban buh ia ki rekod ha kaba iadei bad ka pule puthi jong ki khynnah pule ha ki jaka pule bapher. Ula iathuh ruh ba ki dang khmih bniah halor ka jinglait thylli ki kam khamtam eh ha ki skul sorkar bad kumbal ong mynta hi, ki don kumba 500 tylli ki kam kiba lait ha ki skul Lower Primary bad Upper Primary kiba don ha ka jylla.

Ka tnad pule puthi kala bthah ruh ia ki ophisar ban pynkhlain ia ka jingleit jurip ia ki skul ban kyntiew bad pynkhlain ia ka rukom treikam ka jongki kaban don ruh ia ka jingkitkhlieh bad la bthah ia ki ophisar ka tnad pule puthi ba kin pynjur ia ka jingleit jurip ban pynthikna ba ki skul kin treikam bha bad ba ki khynnah kin ioh ia ki jingdonkam ki jongki.U Tembe ula iathuh ba ki skul kila sdang ha ka 10 tarik mynta u bnai bad ha kane ka sngi sdang skul la bthah ia ki ophisar ka tnad pule puthi ba kin leit jurip ia ki skul bad ban pynshisha ia ka rukom treikam ka jongki bad ki lah dep ruh ban aiti ia ki kaiphod. Une u heh ophisar ula iathuh ba ka jingleit jurip ia ki skul kana long mana la ka por ha kaba ki ophisar ka tnad pule puthi kin khmih bniah ia ka jingwan ai jinghikai jong ki nonghikai, ka jingsam ia ki kot ki sla bad ki jainskul bad ki kyndon kiba la bhah lyngba ka Midday Meal bad ka tnad pule puthi kala pyntreikam ruh ia ka School Monitoring App ban pynthikna ba kan don ia ka jingtreikam kaba bha bad kaba khuid ba suba.