Iakren u Sadguru bad u Commissioner ka tnad pule ban sdang sam ei ki jingbam tei met ia 10 hajar ki khynnah skul

U Lat ka jylla Meghalaya, u CH Vijayashankar hynne ka Sngi u Blei ula pdiang burom ia u Sadguru Sri Madhusudan Sai, u nongialam niam ba la pawnam kylleng ka pyrthei halor ka jingnoh synniang ha ka imlang sahlang ha ka jingwan jngoh jong u ha Raj Bhavan, Shillong. Ha kane ka jingiakynduh, u Lat ka Jylla ula pynpaw ia ka jingsngewnguh ia u Sadguru Sri Madhusudan Sai ia ka jingnoh synniang ba khraw jong u ha ka imlang sahlang khamtam eh ha ka liang ka pule puthi, ka koit ka khiah bad halor ka jingsam ei ia ka bam tei met ba la kyntiew ia ki briew ha kylleng jong ka ri India. U Lat ula pynpaw ruh ia ka jingsngewtynnad halor ka jingiatreilang hapdeng u Sadguru bad ka sorkar Assam ban sdang ia ka Morning Nutrition Programme, ban sam ei ia ki jingbam kiba tei sha ki khynnah skul. Ula ong, ba kane ka jingthmu kala ai jingmyntoi ia ki lak ngut kaba pyni ruh ia ka jingskhem jingmut ha kaban noh synniang na ka bynta ka bha ka miat jong ki paidbah.

U Lat ka jylla ula pynpaw ia ka jingsngewnguh ia u Sadguru Sri Madhusudan Sai uba la wan jngoh ia ka jylla Meghalaya, ka ban long kaei kaei kaban iai sah kynmaw ha ka liang ka niam bad ka jingai mynsiem ban trei na ka bynta ka imlang sahlang. Katba u Sadguru ula ban jur ia ka jingkongsan jong ka “Vasudhaiva Kutumbakam” (Kawei ka Pyrthei, Kawei ka Longiing) bad ula kyntu ia baroh ba ki dei ban don ia ka mynsiem ban shakri bad ba don ia ka jingsngewlem. U Sadguru ula iakynduh ruh ia u Commissioner and Secretary ka tnad pule puthi ka jylla u Vijay Kumar Mantri ha kaba kila iakren ban sdang ia ka jingsam ei ia ki jingbam ba tei met ia kumba 10,000 ngut ki khynnah skul ha ka jylla Meghalaya.

U Sadguru ula iaroh ruh ia ka jylla Meghalaya ia ka jingitynnad ia ki jaka bad ka mariang ka jong ka bad ka jingdon ia ki kynbat bad ula pynpaw ba don ia ka jingthmu ban noh synniang ruh ha kaba iadei bad ka koit ka khiah. Ha kane ka sngi la pynlong ruh ia ka prokram ha kaba ka Geetanjali Dance Academy kala pynbyrngia bad pynsngewtynnad ia baroh kiba la wan ha kane ka prokram ha Raj Bhavan.