Ba byrngem pynduh jingithuh u Himanta, dawa ka BJP ban tohkit halor ka USTM

Ka Meghalaya Bharatiya Janata Party (BJP) ka la dawa na ka Sorkar Jylla ban tohkit halor ki jingkynnoh pyrshah ia ka University of Science and Technology (USTM) ha Ri-Bhoi District. Ha ka kyrwoh u State General Secretary ka Meghalaya BJP u Bah Wankit Pohshna ula ong, “Ha kane ka kynti, ka jingkynnoh ka long kaba sngewkhia bad ka dawa ban tohkit biah da ki bor ne ki kynhun ba pdeng. Wat la ka jingsuba kaba rit eh shaphang ki degree thok bad ki Certificate thok, ki don ki jingktah ba jur ia ka lawei ki samla pule. kumta ka Sorkar Jylla ka dei ban shim ka jingkitkhlieh ban tohkit ban lap ia ka jingshisha”.

“Wat la ka long kaba shisha ba uno uno ulah ban kynnoh, hynrei ka jingshisha ka long ba ïa ki jingkynnoh la wanrah da u Myntri Rangbah ka Jylla ba marjan bad kane ka Sorkar Jylla bad byrngem ban weng noh ka jingithuh ia ki kyrdan pule ki samla ba pass na USTM. Namarkata ka donkam ia ka Sorkar Meghalaya ban phah tohkit khnang ba ka lawei ki samla pule kan don jingma khamtam kito ki ban thep kam hadien habud” u la ong.

U Bah Wankitbok ula ong, “Ka jingtohkit ba shisha ka Sorkar Meghalaya kan pynthikna kawei na ki ar tylli ki jingthmu. Lada ki jingkynnoh ki long shisha, ka jingpynngat ain mardor kan pynduna ia ka jingjulor kaba la jia ia ki samla pule ha USTM. Lada ki jingtohkit ki pynshisha ba ki jingkynnoh ki long kiba bakla ne ki bym don nongrim ki samla pule kin sngewshngain ha ka jingpule jong ki”.