Palat hajar poi ki nongkyrshan Umroi, kob ka NPP ban jop bun seat

Ka jingialap ileksion kaba khatduh ha baroh ki Autonomous District Council (ADC) ka la poi sha kaba kut haba la sakhi ia ki kynhun sain hima bapher bapher ki la mih ban pynlong ia ki jingialang paidbah ban khot ban wer ia ki paidbah ban ai jingkyrshan ia ki kynhun jong ki bad ruh ban pynjop ia u kyrtong jong ki, ia kane la sakhi lang ruh ha Umroi Konstituensi, ha kaba ka party National People’s Party (NPP) ruh ka la pynlong da ka public rally ha kaba la sakhi ba da ki hajar ngut ki paidbah kane ka Konstituensi ki la tuid sha ka madan jong ka Umroi Nongrah ban sngap ia ki nia ki jutang jong ki kynrem ki lyndan kane ka party. Ha ka jingialap ileksion ha Umroi na ka party ka NPP la wan ban ai jingkren naduh u Bah Ngaitlang Dhar, MLA barim ka Umroi, u Bah Bajop Pyngrope, MDC ka Rambrai Jyrngam, u Bah Damanbait Lamare, MLA ka Umroi, u Bah Rangkynsai Kharbuki, MDC u ba dei ruh u kyrtong ka party NPP nalor kiwei kiwei ki heh nongialam ka party NPP.

Haba kren pynshai paidbah ha kane ka jingialang paidbah, baroh ki nongkren ki la pynshai ba ka party NPP ka la nang iohbor bad kaba la pyntikna ba kum ka party kan ioh khur ia ka jingjop kaba don burom ha kane ka ileksion MDC ileksion kaba mynta, da kaba ki la kynthoh jur ia kito ki kynhun sain hima kiba la shu lapmiet ka kynthoh da kumne kumtai ia ka NPP ba ka dei ka seng kaba bamsap, kaba tuh hynrei kim nud pat ban ujor ejehar halor kita ki jingkynnoh, watla kiba bun ki shu kynthoh kane ka la nang pynkhlaiñ pat ia ka NPP.”Wat heh ka tyngam ban ong Ieid Jaidbynriew, haba phim lah ban pyni ia ka kam, ka NPP ka pyni ia ka jingieid jaidbynriew lyngba ka jinglah ban wanrah ia ki kam pynroi bapher bapher ban kyntiew ia ki Shnong ki thaw kane kein kata ka kam na bynta u paidbah kaba dei ka nongrim jong ka party”, ong ki nongkren.

Na ka liang u Bah Rangkynsai Kharbuki, kum u kyrtong u la ong, ba kam pher ba kiwei kiwei ki kynhun ki kynthoh ia u da kumne kumtai da kaba pyni ruh ia kata ka voice record kaba ym tip ka dei jong no, hynrei u paidbah u dei u ba stad bad u lah ban bishar kham bha, nga ai khublei kyrpang ia baroh ki paidbah kiba la ai jingkyrshan ia u ha kiba bun ki liang, bad u kyrmen ruh ba kin ai jingkyrshan kaba radbah ban pynjop ia u ha kane ka ileksion kaban wan da kaba thep ia ka vote jong ki ha ka NPP ha ka 21 tarik u Rymphang. U la ong ruh, ba ka party NPP ka la pyntikna lypa ba napdeng ki 29 tylli ki Autonomous District Council ka KHADC kumba 17 tylli ki seat kan leit lypa sha ka NPP ban synshar laitluid hapoh ka Iingdorbar jong ka KHADC.