Ki kyrtong ka VPP bad ka jingioh vote

Na ki 29 tylli ki konstiwensi ha Khasi Hills Autnomous District Council (KHADC), ka Voice of the People Party (VPP) ka la ioh ban sar jingjop haduh 17 tylli ki konstiwensi. Ki Khat Hynniew tylli ki konstiwensi kiba la sar ka VPP ki kynthup ka Mawhati konstiwensi u bah Kynjohlang Rangtong u ioh 11592 vote, Umsning u Bah Banrikus Nongsteng u ioh 10530 vote, Umroi konstiwensi u bah Isynei Hinge u ioh 9937, Sohryngkham konstiwensi u Bill Clinton Wankhar u ioh 14178 vote, Mawkynrew konstiwensi u bah Seiborlang Warbah u ioh 15261 vote, Nongkrem konstiwensi u bah Kitborlang Syiem u ioh 10409 vote, Langkyrdem Laitkroh konstiwensi u bah Shemborlang Rynjah u ioh 11279 vote, Mylliem konstiwensi ka kong Aiban daplin F Lyngdoh ka ioh 17451 vote, Nongthymmai konstiwensi u bah Winston Tony Lyngdoh u ioh 9868 vote, Laitumkhrah Malki konstiwensi ka kong Deity H Majaw ka ioh 4961 vote, Mawkhar Pynthorumkhrah konstiwensi u bah Strong Pillar Kharjana u ioh 6982 vote, Jaiaw konstiwensi u bah Danzil Raynard Chen u ioh 5463 vote, Mawlai konstiwensi u bah Eddieson Kharumnuid u ioh 22619 vote, Maphlang Diengiei konstiwensi u Lancaster Marbaniang u ioh 12335 vote, Pariong Mathadraishan konstiwensi u bah Powell Sohkhlet u ioh 16140 vote, Mawkyrwat konstiwensi u bah Pynkhrawboklin Kharjahrin u ioh 12034 bad Nongstoin konstiwensi u Juristman Iawphniaw u ioh 16928.

Haba kren sha ki lad pathai khubor hadien ba la pynbna jingjop, ki kyrtong ka VPP ki la pynpaw ia ka jingsngewkmen bad ki la ai khublei ia ki paidbah kiba la ai jingkyrshan haduh ba kin da poi sha ka thong jingjop.Ka kong Aibandalin Lyngdoh ka kyrtong na Mylliem ka la pynpaw ka jingsngewnguh ia ki paidbah kiba la jied ia ka nongrim ka party bad ki la ieng skhem ha ka jingmut jong ki, watla hapdeng ka jingtreikam bor bah ka pisa. Ka la ong ba kumba ki paidbah ki la jied ia ka kum ka MDC, kan ai ka jingshakri hok sha ki paidbah ka konstiwensi bad kan trei ha ka nongrim jong ka party. U Kyrtong na Nongthymmai konstiwensi u bah Winston Tony Lyngdoh ula pynpaw ka jingsngewnguh ia ki paidbah kiba la pynjop donburom ia ka VPP.  “ Ngi ngeit skhem kumba ngi la mih ban iakhun ia ka ilekshon da ka bor jingduwai, ngin pynkut bad ngin iaid da ka bor ba la ai da u Blei,” ong u bah Winston. Halor ka jingioh sar ka VPP ha kylleng ki konstiwensi, u bah Winston ula ong ba ki paidbah ki don ia ka sngewthuh bad ki nongialam ka party ruh ki long kiba trei shitom na kawei ka konstiwensi sha kawei.

Katba u kyrtong na Mawkhar Pynthorumkhrah konstiwensi u bah Strong Pillar Kharjana, ula kubur ba ka jingjop jong u pyrshah ia u CEM barim ka KHADC u bah PN Syiem, kadei na ki vote ba jar jar jong ki paidbah. Ula ong ba ka jingtrei jar jar napoh ki paidbah kadei ka jingieid jong ki ia u kandidet bad ia ka party. U kyrtong na Nongkrem konstiwensi u bah Kitborlang Syiem ula pynpaw ka jingsngewnguh ia ki paidbah kiba la ibit ia u ban mih khmat sha KHADC. Ka jingjop jong ka party, kadei namar ba ki paidbah ki la phai khmat sha kane ka party ban ai ka jingshakri kaba paka sha ki paidbah.