Sam shithi thungkam u MR sha 200 ngut ki Nurse bad 115 ki NAM

U Myntri Rangbah ka Jylla u Conrad K Sangma hynne ka sngi, ula sam ia ki shithi thungkam (Appointment Letter) sha ki 200 ngut ki Nurse bad 115 ngut ki nongtrei jongka National AYUSH Mission (NAM) bad ula pyllait ruh ia ka Meghalaya State Antibiotic Policy 2025-2026. Ki 200 ngut ki Nurse kila shah thungkam hapoh jong ka Meghalaya Medical Services Recruitment Board (MMSRB) bad 115 ngut ki nongtrei hapoh jongka National AYUSH Mission (NAM). “Kane ka long palat ia ka kam bad kadei ka jingkhot.Leit sha man la ki nongpang da ka jingsngew, ka jingleh isynei ka jong phi kan wanrah ia ka jingkylla ia ka jingim” ong u Myntri Rangbah.Naduh u snem 2010, ka jingmang tyngka ha ka koit ka khiah kala kiew mynta sha ka hynriew shah kata na ka T.300 Klur sha ka T.1,700 Klur ha u 2023 bad  la bhah tyngka na ka bynta ki PHC, CHC, Sub-Centres bad ki District Hospital, ban tei ia ki jingtei, ban pynbiang ia ki tiar ki tar bad ia ki kor ki bor, ki kor IT bad kiwei kiwei.

U Conrad Sangma ula ong, ba ha u snem 2018 la mad ia ka jingeh na ka jingduna haka jingdon jong ki doctor, kumta ka sorkar kala thungkam 500 ngut ki doctor hapoh jong ka 3 bnai hadien ba la ioh jingmynjur na ka kynhun myntri bad ka thong jong ka sorkar ka long kaba shai, ba uno uno u nongshong shnong yn ym donkam ban leit shabar ka jylla Meghalaya ban ioh jingsumar. “Ngi dang treikam ban pynlong ia ki jaka ai jingsumar ki jong ngi kum ki jaka pdeng jong ka thain bad ha ka pyrthei, ha ryngkat bad ka khot sngewbha ia ki riewshimet ban pynkhlain ia ki jingai jingshakri ha ki thain nongkyndong” la ong u Conrad. Katba ka Myntri ka koit ka khiah ka Kong Ampareen Lyngdoh, kala kyntu ia kine kiba dang shu iohkam ban shakri ha ki jaka kiba donkam tam bad kala kyntu ia kiwei kiwei ki samla ban leit pule Nurse bad ka ong, “Ka pyrthei ka donkam shuh shuh ia ki Nurse kum kito kiba don hapoh ka jylla Meghalaya.”

Ki hospital kiba la wan ban iashimbynta ki kynthup ia ka Dr. H. Gordon Roberts Hospital, Nazareth Hospital, Bethany Hospital, Supercare Hospital, Woodland Hospital, Bansara Eye Clinic, SAN-KER Charitable Trust, Children’s Hospital kiba don hapoh ka nongabh Shillong, ka Dr. Norman Tunnel Hospital (Jowai), St. Joseph Hospital (Nongstoiñ), Makarios Medical Centre (Mairang), Holy Cross Hospital (Tura), Tura Christian Hospital (Tura).