Ba jur palat ka dheng kali, ïamir jingmut ka SNSUP bad ka DC

Ka Synjuk Ki Nongsynshar Shnong Upper Shillong (SNSUP) hynne ka sngi ka la ia kynduh iaka Deputy Commissioner (DC) ka East Khasi Hills ka Kong RM Kurbah haka jingdon lang u Superintendent of Police (SP) kumjuh u Additional SP Traffic, BDO Mylliem, Magistrate, Area Manager ka NHIDCL. Kane ka jingiakynduh kadei ban pynsngew halor ka jingjur palat ka dheng kali ha ka thain Upper Shillong naduh jingkieng Umshyrpi ter ter haduh 7 Mer.Haka jingïalang ka Synjuk ka la kyrpad ia ka DC ba kan leh eiei halor kane namar ki paidbah ym tang na ka thain upper Shillong hynrei naduh West Khasi Hills, na ka thaiñ Pynursla, Sohra bad shaduh Sor Shillong ki la shah ktah lut.

Naka liang u Adviser jong ka Synjuk u Bah Daniel Thangkhiew u la ïathuh ba u la pyntip ha ka DC bad ha ki heh pulit ba kane ka la buh jingeh ia kiba bun khamtam ki Ambulance bad kali private ba kit nongpang, ki khynnah skul, ki nong ïew bad ki nongtrei sorkar ruh kumjuh.Na ka liang ka Synjuk ki la pynpaw ruh ia ka jingisynei naba bun ki paidbah ki hap hiar noh na ki kali kamai ban iaid da ka kjat naduh Laimer shaduh sha sor bad ki hap ban leit pynjhieh ruh harud surok bym biang ki painkhana ne bym don ki petrol pump hajan ban leit bar.

“Na ka liang ka DC ka la mynjur ban ia leit jurip lang markhmat ne ka spot inspection lashai ka sngi ha ka por 9 baje mynstep ha ka jingiadonlang ki nongialam ka Synjuk, na ka liang ka NHIDCL, BDO, ADC EKH, Traffic Police bad kiwei ki tnad ka ban sdang na jingkieng Umshyrpi shaduh Laimer ter ter,” la iathuh shuh shuh u Bah Daniel Thangkhiew.