Ki karkhana ki dei ban treikam na bynta ka roi ka bym ktah ia ka mariang

Ka Myntri Sorkar Pdeng kaba khmih ia ka Pla Tyngka bad Coporate Affairs ka Nirmala Sitharaman, ka la lum ïa ka jingïalang bad ki nongïalam jong ki kam khaii, ki nongseng kam seng jam, ki nongmihkhmat na ki karkhana bad ki nongshong shnong. Ia kane ka prokram la pynlong da ka sorkar Meghalaya ha ryngkat ka jingiatreilang bad Department of Financial Services (DFS), ka Central Board of Indirect Taxes & Customs (CBIC), bad ka Central Board of Direct Taxes (CBDT) bad ha kane ka jingialang la iadonlang u Chairman ka CBIC u Sanjay Kumar Agarwal, u dkhot ka CBIC u Mohan Kumar Singh, ki heh ophisar na ka tnad pla tyngka, ka sorkar Meghalaya bad ki tnad bapher bapher. Ha kane ka jingialang ka Sitharaman ka la ai khublei ïa ka Kong Rimiful Shylla bad ka Kong Wanjoplin, kiba dei napdeng ki kynthei nongsiew khajna ba pawkhmat jong ka Meghalaya, na ka bynta ka jingnoh synñiang kaba dei ban ai jingïaroh na ka bynta ka jingnoh synniang jong ki ha ka jingsiew khajna jong ka ri.

Ki nongiashim bynta ki la ai jingai jingmut bapher bapher kiba kynthup ia ka jingdonkam ban pynthikna ia ka rukom treikam kaba ia dei bad ka roi ka par kaba pynneh pynsah ia ka mariang, ka jingdonkam ban kyntiew ia ka jingwad bniah bad jingpynroi bad ka jingiarap pisa na ka bynta ki jaka treikam kiba don bynta ha ka jingwad bniah bad ka jingpyrkhat kaba kham jylliew ia ka polisi na ka bynta ka kam sah briew. Ki nongiashim bynta ki la pynpaw ruh ia ka jingdonkam ban wanrah ia ki karkhana jong ki trai ri hapoh ka Targeted Champion Sector Scheme, ban pyniar ia ka lad ban ioh ram bad ki iew kiba kham bha na ka bynta ki startup bad ki MSME, khamtam kito kiba dei na ka thain shatei lammihngi bad ban kyntiew ia ki jingbei tyngka ka sorkar pdeng ban kyntiew ia ka roi ka par jong ki karkhana ha ka thain.

Kila pynpaw ruh ïa ki jingsngewkhia halor ka jinglut jingsep kaba heh ha ka liang ka jingpynpoi mar namar ki jingeh ha ka jaka jong ka thaiñ, da kaba khot ban pynbeit ïa ki jingïarap ha ka leit ka wan. Ka Sitharaman kala pdiang ïa ki jingai jingmut bad kala kular ba ka Sorkar Pdeng ban synshar ha ka rukom kaba kynthup lang, kaba shimkhia bad kaba ïahap bad ka thaiñ. Kala pynpaw ia ka jingdonkam jong ka jingthaw polisi kaba iashim bynta lang bad kala ban jur ba ka sorkar ka trei shitom ban pynbiang ia ki rukom siew khajna bad ki rukom pyniaid pisa kiba kham suk bad kham biang na ka bynta baroh kiba iadon bynta bad kala pynshlur ruh ia ka jingiatreilang hapdeng ki nongshong shnong, ki karkhana bad ki nongthaw polisi kum ka lad ban iatreilang ban thaw ia ki buit kiba seisoh na ka bynta ka roi ka par.