Ka jingpynkynriah nongdie madan na Khyndai Lad katkum ka jingbthah ka High Court

U Special Officer ba thung da ka Meghalaya High Court u Senior Advocate Subhasis Chakravarty hynne ka sngi ula lum ka jingialang ban iakren halor ki sienjam ban pynkynriah ia ki nongdie madan na ki thain Khyndai Lad sha ki jaka ba la ithuh da ka Sorkar Jylla. Ia kane ka jingialang la pynlong ha kamra ka Deputy Commissioner (DC) East Khasi Hills ka Kong RM Kurbah ha ka jingdon lang ki bor District, Shillong Municipal Board (SMB), ki dkhot jong ka Provisional Town Vending Committee (PTVC) bad ki dkhot jong ka Meghalaya and Greater Shillong Progressive Hawkers and Street Vendors Association (MGSPHSVA). Haba kren sha ki lad pathai khubor hadien ka jingialang u Special Officer ba thung da ka Meghalaya High Court u Subhasis Chakravarty u la ong ba ka jingialang ka la long kaba seisoh hapdeng ki kynhun bapher bapher ha kaba la iakren kumno ban pyniaid shakhmat ia ka jingpynkynriah ia ki nongdie jingdie madan bad ia ka jingai ia ka Certificates of Vending (CoV).

“Kumta ki bor pyniaid district kin iaid shakhmat ban pynkynriah ia ki nongdie madan katkum ka rai kaba la shim halor kane ka mat” u la ong. Ha kaba ia dei bad ka jingkylli, u Special Officer ula pynpaw ba yn pyndonkam da ka ap bad ban peit ne ka “wait-and-watch” bad ka ong “To ngin ia peit shwa kumno ka iaid shakhmat. Ngin sa tip shaphang ka jongka katba kane ka kam ka dang iaid shakhmat”. Lah ban kdew hangne ba u Senior advocate Subhasis Chakrawarty, ha ka shithi bala phah sha ka Deputy Commissioner Kong RM Kurbah, ula kdew ia ka hukum ka High Court ba 3 tarik Naitung, kaba bthah ban pynkhreh ia ka thup kyrteng jong ki dukan madan ba la ioh jingbit lane don licence ha ka jingiasyllok bad ka seng ki nongshong dukan madan bad ki bor ba dei khmih. Ka thup, katkum ka hukum ka Iingkashari, kam pat dep pynkhreh satia, kumta ka la buh ha ka jingeh ban ithuh ia ki nongshong dukan madan ha ka thain.U Special Officer ula pynpaw ba ka jingkyndang ia ki dukan ha kane ka khep kan dei ka jingpynkhein kaba shai ia ka hukum ka Iingkashari.

Namar kane, u Special Officer ula ai jingmut ia ka Deputy Commissoner ban sangeh shuwa ha kaban pynlong ia ka jingkyndang tad hadien bala dep pyntreikam ia ki jingbthah jong ka Iingkashari.“Ia ka jingbthah jong ka Iingkashari ym pat pyntreikam satia bad kumta ka jingkylli ba mano ba dei ki nong shong dukan madan bala ioh licence ha Khyndailad ka dei ka bym pat lah pynthikna. Kumta kano kano ka jingkyndang ha kane ka khep, kan dei ka jingpynkhein ia ka hukum ka Iingkashari. Kumta, la ai jingmut ba ym pat dei ban kyndang ha kane ka por” ong u Chakrawarty haba jubab ia ka shithi ka DC ba 8 tarik Naitung, kaba la phah sha u Chief Executive Officer (CEO) ka Shillong Municipal Board (SMB).Ha ka hukum ba pynmih ha ka 3 tarik Naitung, ka Iingkashari ka la bthah ba hapoh ka jingkhmih u Special Officer bad ha ryngkat ka jingiasyllok bad u General Secretary ka seng ki nongshong dukan madan, ki bor khmih bad ki Pulit kin pynkhreh ia ka thup jong ki briew ba shong dukan madan bala ioh jingbit ne don licence, kaba la pyntip ba ki don kumba 349 ngut.Ka Iingkashari ka la bthah ba dei ban shah ia ki nongshong dukan madan ba don licence ba kin die jingdie ha ka thain Police Bazaar hapoh ka por bala buh (12:30 baje janmiet haduh 2 baje janmiet bad 7:30 baje mynmiet haduh 9 baje mynmiet) haba kular ruh ba kim dei ban shong palat ia ka por ba la buh. La ong ruh ba ym shah shuh ia ki nongshong dukan madan ki bym don licence ba kin die mar ha ka thain.Ka Iingkashari ka la bthah ia u Special Officer ban pynthikna ia ka jingpyntreikam kaba suk ba sain ia ka hukum ka Iingkashari bad aiti ia ka kaiphod hapoh ka 5 tarik Nailar 2025.