Rai Ka Sur U Paidbah Bri Hynñiewtrep ban pynlong General Meeting halor ki kam Khappud

Ka Executive Committee jong Ka Sur U Paidbah Bri Hynñiewtrep (KSUPB7T) kaba la shong jingïalang hynne ka sngi ka 17 tarik Naitung, ka la shim ïa ka rai ban pynlong ïa ka General Meeting kaba kyrpang ban ïakren halor ka mat kaba ïadei bad ka Border ne khappud. Kane ka rai kaba ka Executive Committee ka la shim hapoh ka jingïalam u Chairman ka KSUPB7T, u Bah Kyrmenlang Uriah ka dei kaba la lum kyrpang ha ka sngi ba ka Bri U Hynñiewtrep bad ka Jylla ka kynmaw burom ruh ïa ka lyngkhuh sngi ïap ba 190 snem jong u Syiem ka Hima Nongkhlaw, u Paiem Tirot Sing Syiem.

Haba shong ban ïa pyrkhat ïa kane ka mat, na ka liang u Chairman Ka Sur U Paidbah Bri Hynñiewtrep, u Bah Kyrmen u la pynsngew ba ïa kane ka mat la shim ba kan long kaba kyrpang ban ïakren ka dei hadien ka jingïoh pdiang ïa ka jingud jingnam na ki paradoh parasnam kiba sah ha ki jaka khappud kiba ki don ki jaka, kiba ka Sorkar Jylla Meghalaya ka la dep ban aiti bad ki katto ki shnong kiba dang thmu ban pynhap noh hapoh u pud u sam ka Assam. Ha ka jingpdiang ka EC ban pynlong ïa katei ka General Meeting kyrpang halor ka “Border Issue” bad lada don lang ruh kiwei ki mat ban ïakren, Ka Sur U Paidbah Bri Hynñiewtrep kan ïawer naduh ïa ki nongkyrshan Ka Sur U Paidbah WhatsApp Group, ki nongïalam jong ki Hima, ki Elaka, ka synjuk ki nongsynshar shnong, ki nongïalam ka synjuk ki rangbah kur, ki seng treimon sngewbha bad ki paidbah nongshong shnong kiba long kloi ban ïa tynrong lem ïa ka eh ka shon jong ka Bri U Hynñiewtrep.

Ïa kane ka General Meeting, ka Executive Committee ka la shim ïa ka rai ban pynlong ha ka 2 tarik Nailar, 2025 naduh ka por 11 baje mynstep kaba ïa ka jaka yn sa pyntip ha ki khyndiat sngi.