Ka jingthung khlaw kaba duna tam ha India la shem ha Meghalaya

Ka Meghalaya High Court ka la pynpaw ba ka jylla ka don ïa ka jingtreikam kaba sniew tam ha ka jingpynlong khlaw da kaba siew kylliang, kaba la pynmih ïa ka jingsngewkhia halor ki jingpyrshang ban pynbha pat ïa ka mariang hadien ki projek pynpra khlaw kiba heh, khamtam ha ka thaiñ Lawsohtun. U bah Paul u la ai ia kane ka jingkynthoh hakhmat ka division bench jong u Chief Justice IP Mukerji bad u Justice W Diengdoh ba haba ka sorkar pdeng ka la ai bor ban pom pathar ia ki khlaw na ka bynta ka Shillong Peak Ropeway Cable Car Project bad la leh ia kum kane ka kam, dei ban don ka jingthung dieng kaba biang (proper compensatory aforestation) ha ki sawdong sawkun jong ka projek ym ha kano kano ka jaka kaba jngai. Ka kashari ka la lap ba ki kam pom pathar ia ki khlaw ki btap ki dei kiba la leh katkum ka ain ryngkat bad ki jingbit kiba biang na ka sorkar pdeng na ka bynta ka projek cable car jong ka tnad jngohkai pyrthei ha Raid Laban Reserve Forests. Hynrei u nongujor u kynthoh ba ym shym la pynbiang ia ka jingsiew kaba biang na ka bynta ka mariang.

U Advocate General A Kumar u la kubur ia ka jingkloi jong ka sorkar ban shim ia ka kam pynthung khlaw. Ka kashari ka la bthah ia u Advocate General bad ia u nongiasaid ain jong u nongmudui ban iatreilang ban leit jngoh ia ka jaka shna projek ropeway ban bishar bniah ia ka jinglah ban pyntrei khlaw da kaba siew bai lutksan. Ka sorkar jylla ka don ka jingkitkhlieh ban pynbeit ia ki jingdonkam na ka bynta kane ka jingleit jngoh. Ka kaiphod ba iatreilang kan ialam ia ki jingbthah jong ka iingbishar ha ka lawei halor ka jingpynkylla dur ia ka mariang. Ia kane ka mukotduma la buh por ban bishar ha ka 14 tarik u Naiwieng 2025, ban bishar bniah ia ki jinglap bad ban buh ia ki lad ki lynti ban weng ia ka jingduna jong ka Meghalaya ha ka jingpynbha ia ka mariang.