T.2 lak yn iarap ia kiba iap aksiden ha Thadlaskeiñ, dang jah rngai u Driver trok

Ha ka jingialang ka District Road Safety Committee ba la khot pynlong da u MLA ka 2-Jowai u Wailadmiki Shylla hynne ka sngi ha Highwind Thadlaskeiñ na ka bynta ban pyrkhat ia ka jingshngaiñ ka iaid ka ieng ki kali ha surok kumjuh ki paidbah ba iaid lynti, ba la donlang naduh ki bor district, ka tnat DTO, ka tnat pulit, ka tnat PWD, ka tnat jong ka koit ka khiah ki nongialam shnong ka Mukhla pyllun, u Wailadmiki Shylla MLA ka 2-Jowai haba kren sha ki lad pathai khubor uiathuh ba la donlang kiba haiing hasem jong kito ba la khlad na ka aksident ba la jia ha Thadlaskeiñ ha ka 21 tarik mynta u bnai.

Ha kane ka jingialang u iathuh nalor ka jingiamir jingmut ban buh ki dak ki shin khnang ba ki kali kin pynjai jai lypa shwa ban poi ha ka jaka ba lah ban buh jingma, ki la ioh ruh ban ai jingmut sha kiba haiing hasem kito kiba la khlad halor ka skhim ai jingiarap ka sorkar Jylla ba 2 lak tyngka bad 50 hajar tyngka na ka bynta kito ba la mynsaw bad kane ka shong katkum ka jinglah jong ki ban pynbiang ia ki kot ki sla. Haba kyntu ia ki paidbah ban shim ia ki lad jingiarap na ka sorkar lada mad ia ki jingjia accident ha lynti syngkien, u pynkynmaw ruh ba nyngkong hi mar ia jia dei ban pyntip nyngkong shwa sha ki pulit khang ba kin leh ia ka kam.

Ha kajuh ka por u iathuh ba nangne shakhmat un kyntu ia ka District Road Safety Committee ba kan pynlong ia ki jingpynshai paidbah na ka por sha ka por khang ba ki paidbah kin tip kumno ban long phikir bad ruh kumno ban ioh ki lad jingiarap na ka sorkar.Kum ban pynkynmaw halor katei ka jingjia accident ka longkmie ba shah tynrah bad i khun 2 snem ba la khlad, haduh mynta ka dang don hapdeng ka jingshitom jur.U nongniah katei ka trok pat uba la jah rngai naduh katei ka sngi ki pulit kim pat lap ia u.