Lap ka EC ha ka jingjurip ba ki jingtei ha jingkieng Kalong ki kylla ktem siew

Ka EC jong ka Khasi Hills Autonomous District Council (KHADC) ka la hiar ban jurip ia ka Khasi Traditional and Cultural Centre kaba don ha Jingkieng Kalong, hajan ka Pung Umiam. Ha katei ka jingjurip ba la ialam da u EM ka tnad Council Asset u Bah Pynkhraw Kharjahrin, la lap ba ki jingtei baroh ha katei ka jaka, ki la i sepei bad bun ki la shu jot bad sah lyngkrang. Ia kane ka jingjurip ka EC ka la pyllong hadien ba ki la ioh pdiang ia ka jingujor na ki paidbah.U EM u bah Kharjahrin ula ong ba ha ka jingjurip jong ki, la lap ba ki jingtei ia kane ka projek kaba la mang T.14 klur ka la long sepei namar don ki jingtei kiba la jan dep la hap sangeh noh kynsan kynsan bad namar ba la shu ieh kumto khlem bteng shuh ka jingtrei bun ki la jot bad kylla long pynban ki ktem jong ki kam awria bad kiwei de ki kam sniew kiba ktah ia ka jingshongshngaiñ ki paidbah.

U bah Kharjahrin ula ong ba ha kane ka jaka, la tei ia ka Hall kaba don lang bad ki kamra, ka Restaurant, ki iing basa ne ki jaka sah kumba 10 tylli bad kiwei kiwei kiwei de ki jingtei, hynrei baroh ki la jot rathai lut. Katkum ka jingong u EM, ia kane ka projek la sdang pyntrei naduh u snem 2018 hynrei ha u snem 2019, hadien ba la ioh ia ka jingujor na ka Meghalaya State Pollution Control Board (MSPCB) la hap ban pynsahngeh noh ia kane ka projek kaba la bei tyngka da ki klur.

“Kaba i sangsot ka long ba bun ki jingtei kiba la pyllut kum na bynta ban tei ia ka Restaurant, ki cottage, ki la suh u jot rathai,” ula ong. Ula ong ba na ka liang ka EC, kan sa shim ia ki sienjam ban pyntikna ba ki projek ka Council kin long ka jingkyrkhu ia ki paidbah bad kan iarap ban pynmih khajna ia ka Council.