Lyngba ka Agreed Text of Settlement ka ANVC

Ka Sorkar Meghalaya ka la pan jingiarap pisa ba kot T.664.49 Klur na ka Sorkar Pdeng.Na ka T.660 klur tam ka Sorkar Meghalaya ka la mang T.252 klur na bynta ban siew ia ka tulop ki nongtrei GHADC ba la sahteng mynta la 43 bnai.Kane ka long ban siew pyndep ia ka tulop ki nongtrei ka Garo Hills Autonomous District Council (GHADC) bad kane ka jingpan ban iarap pisa ka dei lyngba ka Agreed Text of Settlement ne ka jingiateh kular hapdeng ka Sorkar Pdeng, Sorkar Jylla bad ka kynhun kieng atiar ba la khylliap lama noh ka Achik National Volunteers Council (ANVC) bad ANVCB.

Ha ka shithi ba la phah sha u Secretary, Ministry Home Affairs (MHA), da u Commissioner & Secretary in-charge Planning, Investment Promotion and Sustainable Development Department u Dr Vijay Kumar ula ong, “Ka GHADC ka la buh ia ka jingdawa ia ka jingdonkam T.664,49,27,382 klur na bynta siew tulop bad ki jingdonkam jong ka Council, na ka bhah tyngka jong ka Additional Financing & Special Projects hapoh jong ka jingiateh kular hapdeng ka Sorkar Pdeng, Sorkar Meghalaya bad ka ANVC & ANVC-B. Nga kyntu ia phi ba phin sngewbha ban shimkhia lang ia kane bad ban mynjur ban bhah ia katei ka pisa na ka bynta ka jingdonkam jong ka Council katkum ka Agreed Text of Settlement”.

U Commissioner & Secretary u pyntip ba ka Ministry of Environment Forest and Climate Change ka lah dep ban mynjur ia ki projek ba ia dei bad ka tnad .Ka DPR ba ia dei bad ka jingbuh ia ki Solar Street Lights, jingpynbha ia ki iew ki hat ha ki thain Nongkyndong, ka jingkyntiew ia ka jingrep ia ki soh ki pai bad ka jinglong kongsan jong ki Processing Unit, ka dei ba la phah ia ka jingtyrwa ban iarap pisa ha ka jinglut jingsep kaba kot T.104.34 Klur.“Namar ka jinghiar kynsan ha ka jingioh lum khajna jong ka Council, kam shym la lah ban siew pyndep ia ka tulop jong ki nongtrei bad kumta ka Council ka la pan ia ka jingiarap kaba tang shisien kum ka Grant kaba T.252,01,00,000 klur” ula ong.