Shah kem 2 ngut, kurup suloi 2 tylli, 5 mobile bad wait chukri

Ar ngut ki runar ba donkti ha ki kam tuh ki la shah kem ha ki pulit ka North Garo Hills hadien ba ka thuk thuk ba ki tuh ka la ngat ha ka jingjia aksiden hajan Berubari hapoh ka Bajengdoba Police Station. Ka kynhun pulit mar ia ioh jingtip ba jia ka aksiden, bran ki la mareh ha ka jaka ba jia ban pynlong ia ka jingtohkit. Ha ka jingtohkit, ki pulit ki la lap ba ka kali ar shaka ka la tynrah ia u dieng uba don harud jong ka surok NH 51 bad la lap ba u nongniah bad u nongbud ki la thiah lyngkrang harud surok. Kine ki arngut kynthup u nongniah uba la tip kyrteng u Walchang K Sangma na Salmanpara, SWGH District bad u nongbud la tip kyrteng kum u Mikselbirth Sangma uba ju khot sin u Niksengbirth na ka shnong Gabil Bisa, PS Rongjeng, EGH District), mynta ki don hapdeng ka jingmynsaw bad la pynkit noh ia ki ha Bajengdoba PHC na bynta ban ioh ia ka jingsumar. Ha ka jingtalasi ki pulit, na ki ar tylli ki pla jong kine, la lap pynban ia ki tiar pynmynsaw bad kiwei ki mar kynthup ia ar tylli ki suloi dieng, san tylli ki mobile phone, ka wait khukri bad kiwei de.

Ki Pulit mar mar ki la kurup ruh ia kine ki tiar bad kumjuh ia ka thuk thuk kaba don ia u nombor ML07-B-7072. Katkum ka jingong ki pulit, ha ka jingleh ia ka Medical examination la lap ba kine ki ar ngut kynthup u nongniah bad u nongbud ki dei kiba la dih buaid. Ha ka jingtohkit, ki pulit ki la lap ba u Walchang u dei uba la ju shah kem teng halor ki kam runar pyrshah ia ki kynthei ha Ampati PS bad ula shong ha phatok haduh 7 snem. Katba u Mikselbirth une ruh u dei uba la shah kem teng mynshwa ha ka jingdonkti ha ki kam rah bor.La iathuh kine arngut, ki iakynduh ha District Jail ha Tura, West Garo Hills bad ha kane ka jingiakynduh ha phatok, ki la ia suh buit ba mar ia ioh mih kin sdang ban leh biang ia ki kam runar kumba ki ju leh.

Shuh shuh ha ka jingtohkit ki phla ruh ba ki la tuh ia lai tylli ki mobile phone na ka bus paidbah bad ka bike kaba ki niah na Rongmil, East Garo Hills district ha ki ar sngi ba la dep, ki la thmu ban leit sha Assam ban die hynrei ki iakynduh ia ka jingjia aksiden Berubari.“U Walchang ula phla ruh ba ka suloi dieng ba ki iarah ka dei kaba ula shna hi ha iingsah ka mei ieid jong u ha RC Road, Tura. U la shna khnang ban ioh ban byrngem ban pyntieng ia ki paidbah,” ong ki pulit. Halor kane, na ka liang ki pulit ki la rejister kes pyrshah ia kitei ar ngut bad ka jingtohkot ka dan iaid shakhmat.