Leit jngoh ka kynhun Nongthoh Khubor na NE ia ki Projek sorkar pdeng ha Karnataka

Ka kynhun ki nongthoh khubor ba 14 ngut na ki jylla jong ka thain shatei lammihngi jong ka Meghalaya bad Tripura ka la sdang ia ka jingleit jngoh ia ka jylla Karnataka mynta ka sngi da ka jingthmu ban ioh ia ka jingsngewthuh shaphang ki jaka treikam ba kongsan jong ka Sorkar Pdeng, ki projek ba kongsan ba iadei bad ki kam pynroi bad ka jinghiar pateng ka kolshor jong ka jylla.

Kane ka sienjam ba la pynlong da ka Press Information Bureau (PIB) Shillong ha ka jingïatreilang bad ka PIB Bengaluru, hapoh ka Tnad Information & Broadcasting, sorkar India ka dei kaba la sain dur ban iarap ia ki nongthoh khubor na kane ka thaiñ ban ïatreilang bad ki jaka treikam ba kongsan jong ka ri bad ban pynpaw pyrthei ïa ki kam jong ki na ka bynta ki briew ha ka jylla lajong.

Kane ka kynhun ba kynthup khatwei ngut ki Nongthoh Khubor na Meghalaya bad ar ngut na South Tripura, kiba mihkhmat lang ïa ki kotkhubor, ki lad pathai khubor electronic bad digital. Kine ki kynthup ïa ki kot khubor bad ki rynsan ba pawnam kum ka Meghalaya Times, East Mojo, U Peitngor, T7 News, SP News Agency, Meghalaya Monitor, Mawphor, Highland Post, Hindustan Times, PTI, Dainik Sambad bad Tripura Darpan. Ïa kane ka jingleit jngoh la pynïaid da u Gopajit Das, Assistant Director ka PIB Shillong, uba synran ïa kane ka kynhun kum u Conducting Officer.

Ha kane ka jingleit jngoh, kane ka kynhun kan leit jngoh ïa ki jaka treikam ba kongsan ha ka kam saian bad kiwei kiwei ki jaka treikam kiba kynthup ïa ka Indian Space Research Organisation (ISRO), Indian Institute of Science (IISc), Bharat Heavy Electricals Limited (BHEL), bad Bharat Electronics Limited (BEL). Kine ki jingleit jngoh ki thmu ban pyni ia ka jingkiew jong ka India ha ka jingwad bniah ha ka kam haw haw, ka jingsaindur thymmai ha ka kam science bad ki public sector enterprise.

Nalor ki jingleit jngoh ïa ki jaka treikam, kane ka kynhun kan ioh ruh ban iohi ia ka kolshor bad ka jinghiar pateng ha kylleng ka Bengaluru, Mangaluru bad Mysuru, da kaba pynleit jingmut kyrpang ha ki jaka kum ka Mysuru Palace, kaba ailad ïa ka kynhun ban sakhi ïa ki riti dustur ba riewspah jong ka Karnataka bad ka kam tei jingtei. Ka jingleitjngoh ka kynthup ruh ïa ki jingleit jngoh ïa ka Karnataka Silk Industries Corporation Limited ha Mysuru, ka jingleit jngoh ïa ka district Chamrajnagar ban peit bniah ïa ki kam rep bad ki kam ba ïadei bad kane bad ka jingïakren bad ki jaidbynriew riewlum lyngba ka jingleit jngoh ïa ka Thanda (ka shnong jong ki riewlum).

Kum shibynta jong kane ka jingleit jngoh, ka kynhun ki lad pathai khubor kan leit iakynduh ruh ïa u Latba don burom jong ka jylla Karnataka.

Ka jingleit jngoh ki nongthoh khubor ka dei ka bynta ba kongsan jong ki jingpyrshang jong ka Press Information Bureau ban pynïasoh ïa ki thaiñ, ban kyntiew ïa ka jingïatylli kaba kham khraw ha ka ri bad ban pynthikna ïa ka jingpynbna khubor ba ryntih shaphang ka roi ka par na kylleng ka ri. Ki jingshem kiba la ioh na kane ka jingleit kin iarap ia ki Nongthoh Khubor kiba iashim bynta ban pynmih ia ki khubor kiba jylliew bad kiba bniah na ka bynta ki briew.