Leit jurip ka Committee ka Iing Dorbar ha ki Hospital ia ka jingpyntreikam ia ka MHIS

Ka Public Accounts Committee (PAC) jong ka Meghalaya Legislative Assembly hynne ka sngi, kala leit jurip ia ki 4 tylli ki jaka ai jingsumar kiba kongsan kiba don ha Shillong ban khmih bniah ia ka rukom pyntreikam ia ka Megha Health Insurance Scheme (MHIS). Ka PAC hapoh ka jingialam ka Chairperson ka Miani D. Shira kaba long ruh ka MLA ryngkat ka jingdonlang ki dkhot kiba dei ki MLA kynthup ia u Dr. Celestine Lyngdoh, Bah Brightstarwell Marbaniang bad u Rupa M. Marak ki la leit jurip ia ka Civil Hospital Shillong, Ganesh Das Hospital, ka North Eastern Indira Gandhi Regional Institute of Health and Medical Sciences (NEIGRIHMS) bad ka Super Care Hospital.

Ha kane ka jingjurip, ka Committee ka la iakren bad ki bor pyniaid bad ki nongtrei ka MHIS ban sngewthuh ia ka jingtreikam, ka jingshem jong ki nongioh jingmyntoi bad ki jingeh kiba ktah ia ka rukom treikam ha ka ban ai ia ka jingshakri jong kane ka scheme. Ka Chairperson ka PAC ka Miani D. Shira ka la ong, ba ka jingjurip ka long ban ioh ia ki jingtip bad ban sngewthuh kham bha ia ka jingpyntreikam ia ka MHIS ha kylleng ki hospital ka jylla, sorkar pdeng bad ki hospital ki riew shimet. Kala pynpaw ba watla kane ka scheme ka dei kaba la pynwandur, hynrei ki hospital ki dang bteng ban mad ia ki jingeh ban pyntreikam bad kane ka lah ktah jur bha ia ka jingai jingshakri.

Ka Chairperson ka la ban jur ba ka Committee ka kut jingmut ban pynthikna ba ka jingai jingshakri ka MHIS kan long ia baroh, kaba treikam ryntih bad kaba ia dei bad baroh ki nongshong shnong, kaba lait na kino kino ki jingpynwit. Ka Miani ka la pynshai ruh ba ka Committee ka la iakren bad iatai sani bha bad ki bor pyniaid jong ki hospital bad ki heh ophisar kiba khmih ia ka MHIS, da kaba buh ha ki jingthoh ia ki jingeh bad ban ithuh ia kiei kiba dei ban leh ha ki jaka ban pynbha shuh shuh.