Rai pynrem ka Tribunal ia ka Sheikh Hasina ka Myntri Rangbahduh ka Bangladesh

Ka International Crimes Tribunal jong ka ri Bangladesh ka la rai pynrem iap ia ka Myntri Rangbahduh barim ka Sheikh Hasina halor ka mukotduma thombor bad hiar thma pyrshah ia ka longbriew manbriew jong ki nongshong shnong ka Ri. Ka Iingbishar ka la lap ba ka Myntri Rangbahduh barim ka donkti ban hukum ban thwet bad pynshitom bein ia ki samla pule kiba pynlong ia ka jingïakhih ha u snem ba la dep. Ka ïingbishar ka la rai pynrem ïap ruh ïa u Asaduzzaman Khan Kamal, Myntri kam pohïing barim ka ri Bangladesh halor ki kam runar pyrshah ïa ka jinglong briew. Ka International Crimes Tribunal, ka la ai ruh ia ka rai pyrshah ia ki arngut ki nongiarap jong ka Hasina kata u Asaduzzaman Khan Kamal u Myntri kam pohiing barim bad u heh pulit barim, u Chowdhury Abdullah Al-Mamun, bad la lap ba baroh arngut ki donkti ha ryngkat bad ka Hasina. Ka International Crimes Tribunal, ka ïingbishar jong ki kam runar hapoh ka ri jong ka Bangladesh kaba don ha ka nongbah Dhaka, ka la pynmih ïa ka rai hapdeng ka jingpahara kaba jur bad hapdeng ka jingbymdon jong ka Hasina hadien ba ka la phet krad sha India ha u Nailar 2024.

Ka seng Awami League jong ka Hasina ka la shah khang ban ïakhun iaka rai bad kala mih ka jingsheptieng ba kane ka rai kan lah ban pynmih ïa ka jingkulmar kaba thymmai ha shwa ka jingthep vote. La pynbna ba ka Hasina bad u Kamal ki dei ki nongphetwir bad la bishar ia ki watla kim don haka por bishar katba u Mamun ha kaba sdang u la wan shim bynta shimet shwa ba un kylla long u nongmynjur. Ka ïingbishar ka la kdew ba ka Sorkar ba ialam daka Hasina kam shym la shimkhia ia ki jingdawa jong ki samla pule, bad ha ka jaka ban sngap ia ki samla pule, ka myntri rangbahduh ha katei ka por kala pynrem iaka jingiakhih bad ka kren ia ki kyntien pynjah burom da kaba kdew ba ki samla pule kidei ‘Razakars’, ka kyntien pynjah burom kaba la pyndonkam ha Bangladesh. Ha ka jingbishar, ki nongmudui ki la ïathuh ha ka ïingbishar ba ki la lap ïa ki sakhi sabut jong ka jingbthah beit jong ka Myntri Rangbahduh ban pyndonkam da ka bor ban pynduhjait ïa ka jingïakhih ba la ïalam da ki samla pule ha u bnai Naitung bad Nailar 2024. La mihkhmat ia ka Hasina da u nongiasaid ain ba la thung da ka Sorkar uba la iathuh ha ka iingbishar ba ki jingkynnoh pyrshah ia ka Myntri Rangbahduh ki long ki bym don nongrim bad u la kyrpad ban pyllait ia ka.

U Chief Prosecutor u Mohammad Tajul Islam u la kdew ia ka Hasina kum ka “Mastermind” bad nongshna ba kongsan ban thombor iaki samla ba iakhih hynrei ki nongkyrshan jong ka, ki pynskhem ba ki jingkynnoh ki dei kiba don jingthmu ha ka sain pyrthei. Ka Bangladesh mynta ka don hapdeng ka jingkhihwin ha shwa ban pynbna iaka rai ha kaba ym duna ia ka 30 tylli ki bom kila bthei bad 26 tylli ki kali, ki la shah thang ha kylleng ka ri, ha kine ki khyndiat sngi ba ladep watla ym shym la don kano kano ka jingjia ba sngewsih. Ka Hasina, ka la phet na Bangladesh, ha ka 4 tarik Nailar 2024, hapdeng ka jingjur ka jingkulmar bad naduh katei ka por, ka la sah ha India.  La sngewthuh ruh ba u Kamal ruh u don ha India.  Ka sorkar ba shipor, kaba la ialam da u Muhammad Yunus, ka la thoh shaka Sorkar India ban aiti iaka Hasina, hynrei haduh mynta, ka India, kam pat jubab satia.