Kynmaw burom u bah Sanbor ïa u Woh Kiang Nangbah ha Jowai

U myntri ka tnat Arts and Culture ka sorkar Jylla, u Sanbor Shullai haba leit shim bynta ban long kum u kongsan haki artylli ki jingialang kynmaw burom iaka lyngkhuh sngi iap ba 163 snem u Woh Kiang Nangbah ha Jowai, West Jaiñtia Hills District ula pynkynmaw ba haki snem bala leit kala don ka jingleit jurip jong u iaka jaka jongka tnat transport mar pyrshah ka khyrdop ka Kiang Nangbah Govt College Jowai ban tip  kum ka Kiang Nangbah Square da ka ban tei ruh ia u mot sahnam ba shirynieng u Kiang Nangbah ha katei ka jaka. U ong ha katei ka por u bat kum u myntri ka tnat Arts and Culture bad ula ai ka jingmynjur  hynrei lap ba poi noh ka election bad u khlem long myntri shuh, kumta mynta ka kynti ba u ioh long myntri biang ha kane ka tnat ula buddien biang  bad ula khot iamir jingmut ruh bad u MLA ka thaiñ u Wailadmiki Shylla uba long ruh mynta kum u myntri ka tnat ka koit ka khiah bad tnat sport. Kumta u khot kyntu iaka jingiatreilang jongki nongialam shnong bad ki paidbah naka bynta ban iaid shakhmat ia kane ka kam.

Kine ki artylli ki jingialang kynmaw burom ba u leit sakhi kum u kongsan, kynthup kawei ba pyllong daka Seiñraij Jowai ha Myngkoi Pyrdi, Loompyrdi Iongpiah, kawei pat dei kaba la pynlong daka Kiang Nangbah Ïasiat Khnam Memorial Society ha Kiang Nangbah Memorial Park madiah Kamai Blai Syntu Ksiar. Haka jingialang ha Myngkoi Pyrdi, Loompyrdi Iongpiah, la donlang u Dolloi ka Elaka Jowai u Puramon Kynjing, u President ka Seinraij Jowai u Hercules Toi nalor kiwei pat ki nongialam ka seiñraij Jowai lem ki paidbah, ha kaba naka liang u President Seinraij Jowai bad u Dolloi Elaka Jowai kila pynsngew iaka khana bad jingiaid lynti u Kiang Nangbah kum u khlawait nongialeh pyrshah ban lait naka jingwan shynshar donbor ka sorkar phareng, da kaba ki pynkynmaw ruh iaki kyntien khadduh ba u kren shwa ban  khlad ha u tylli phasi kaba u ong lada ka khlieh jong nga ka phai sha mihngi hapoh 100 snem ka Ri kan ioh laitluid bad kane kala jia shisha kumba ula kren. Bad shwa ka jingialang la don ka jingleit buh syntiew ha u mot sahnam u Kiang Nangbah ha Loom Mooliksoo.

Ha kane ka sngi ka Seinraij Jowai kala pynkup burom ruh iaki nongialam ñiam kiba la shakri iaka kam  palat 25 snem hapoh ka Raij Jowai kamjuh ruh ka jingsam ki prize shaki nongjop haki  jingiakop  baphær baphær bala pynlong haki sngi bala dep. Haka jingialang ha Kiang Nangbah Memorial Park madiah Kamai Blai Syntu Ksiar pat hadien ka jingbuh syntiew ha u mot u Kiang Nangbah kaba don ha kane ka jaka, nalor ka jingkren u kongsan Sanbor Shullai la ioh  ruh ka jingkren na u Jait Daoo Sumer Tresurer ka seng Ïasiat Khnam Memorial Society, na u Rq Laloo EC member bad u Dolloi ka Elaka Jowai u Puramon Kynjing. Ha kane ka jaka ruh nalor ki jingshad jingrwai la don ruh ka jingsam khusnam shaki nongjop haki jingiakop baphær baphær bala pynlong haki sngi bala dep.