Pynrem ka HYC ïa u Bah Prestone

Ka Hynniewtrep Youth Council (HYC) ka la pynrem jur ia ka jingkren u Symbud Myntri Rangbah ka jylla u bah Prestone Tynsong, halor ka jingthmu ban bsuh ia ki kyndon ba iasyriem kum ka ILP ha ka Immigration and Foreigners Act, 2025. U President ka HYC u bah Roy Kupar Synrem, ula ong ba kane kadei tang ka jingthmu ban pyntlot bad pynslem ia ka jingdawa ban pynlong ain ia ka ILP. U la ong ba ki paidbah ka jylla kim dei kiba beij ban shu wanrah ia ki kyndon ba iasyriem kum ka ILP bad kam dei ka ILP.

” Lada ka sorkar jylla ka thmu shisha ban iada ia ki paidbah ka jylla, ka ladei ban pynioh beit ia ka ain ILP bad pura ha ka jaka ban wanrah ia ki kyndon kiba shu iasyriem, khlem da don ka ain ba skhem,” ong u President ka HYC u bah Roy Kupar Synrem. Ula ong ba kano kano ka ain ka bym lah ban kdup bad aibor pura ia ka jylla ban pyniaid ban pyrkhing ia ka rung ka mih, ka kam ka jam, ka khaii pateng bad ka jingrung beain ki bar jylla, kadei ka jingshet jylla ia ka shongsuk shongshngain ki paidbah ka jylla. La ong ba ka jingpynrung ia ki kyndon ba tlot ha ka central Act, kan ym lah ban khang ban iada na ka jingwan rung kyrtlep ki bar jylla.

Ka seng ka la dawa na ka sorkar ba kadei ban ai jubab, ” La ka jylla Meghalaya kan ioh ia ka ILP ba pura kaba don kajuh ka bor kum hapoh ka  Bengal Eastern Frontier Regulation, 1873, ne em? Kano kano ka ba duna ia kane, kan long ka jingthok ka jingshukor ia u paidbah. Ka HYC ka la kren shai ruh ba kan nym lah ban iapein bad ka sorkar kam dei ban pynslem. Ha kajuh ka por ka la byrthen ba lada ka sorkar kam lah ban shimkhia, ka seng kam banse ban shim noh da kiwei ki sienjam ban iaid shakhmat.