Bitar ka Golflink bad Pynthorbah ba kerkut ka Shillong Golf Club ïa ka Golflink

Ki bor pyniaid shnong ka Golflink bad Pynthorbah,  ki la pynpaw ka jingsngew bitar ia ka Shillong Golf Club kaba la ker kut ia ka Golflink ka jaka kaba dei ka lynti iaid ki paidbah. Ki Rangbah Shnong ka Golflink, Pynthorbah hapoh ka Synjuk Ki Rangbah Shnong Pynthorumkhrah Area ha ka 2 tarik Nohprah ki la hiar jurip ia ka jaka ha Golflink kaba ker kut ka Shillong Golf Club ia ka Golf Link kaba dei ka lynti iaid paidbah na Golflink kaba pyniasoh ia ka Pynthorbah. U Chairman jong ka Synjuk Ki Rangbah Shnong Pynthorumkhrah Area, Bah Michael Hek, ryngkat u Rangbah Shnong ka Pynthorbah u Bah Syrpai Marbaniang, ki la ong ba haduh mynta kim shym la pynkam trai ia kane ka jaka ha u Shillong Club, ne ki Kur Rumnong, ki Kur Thangkhiew ne kino kino ki trai jaka.

Kine ki Rangbah shnong kila sngew bitar ia ka jingleh ka Shillong Golf Club ia ka jingker kut ia ka jaka nalor ba ka khlem pynkhuid eiei ha kaba katei ka jaka ka la kylla long kum ka jaka wan bret jaboh ki briew.“ Kane ka shnong Golflink ka la kynthup lang bad ka shnong Shyiap, Pynthorbah, bad ka Shillong Golf Club ha shwa ba kan leh kano kano ka kam kadei ban da kynjoh ktien lang ban ia pynbeit,” ki la ong bad bynrap ka shnong kam khang lada ki ker ia ka jaka lajong hynrei kidei ban pynkhuid lut ia ki jaboh, khnang ban ym don kino kino ki kam sniew.Kila pynkynmaw ruh ba ka Golflink ka dei kaba ju pyndonkam naduh mynshwa da ki paidbah ban leit ban wan, ban ialehkai, ki jingïaseng bad ki kam paidbah bapher bapher. Kila maham ba ka jingkhang lad paidbah kan sa wanrah pynban ia ka jingkulmar bad jingïakynad bad ki paidbah.

Ha kajuh ka por, ki la ong ba ka Shillong Club ha ka shi bnai ki ioh da ki 7 lak ne 8 lak, hynrei ym shym la don ki khynnah samla kiba iohkam iohjam na kine ki shnong.“ Lada u Shillong Club u kwah ban iatreilang bad ka shnong, kidei ban wan shakhmat ban iakren bad ki Rangbah shnong bad ki Executive Committee jong ki shnong, khnang ban ia pynbeit. Hynrei ban shu wan kam bad ker kut khlem tip, ka lah ban pynmih pynban ia ka jingkulmar bad ki paidbah,” ki la ong.