Bam duh ka ding ia ki ïing ha Goenka Compound, hiar jurip u Myntri Sanbor Shullai

Da ki phew tylli ki ïing tap shilliang ha Goenka Compound ba don syndah ka Anjalee Cinema Hall, Shillong ki la shah bam duh ha ki thylliej ding hynne ka sngi bad bun ki briew ki la duh ki mar bad jaka.

Katkum ki khubor ba lah ioh lum, la iathuh ba katei ka jingpluh ding ka la jia ha ka por kumba 4:30 janmiet bad kane ka ding ka la pur sted bad bam duh ia ki iing tap shiliang kiba la don kumba 40 tylli hapoh jong ka Goenka Compound. Ki pulit pynlip ding ki la iakhun tyngeh ban tem ia kane ka ding ban ym pur sha kiwei ki jaka ba don marjan bad ki kali pynlip ding bun ki la wan poi ha kane ka jaka ban tem ia ka ding ba klang.

Haba iakren bad u Bah Vivek Syiem uba long u Superintendent of Police ka East Khasi Hills ula ong, ki pulit mar ia ioh jingtip ia kane ka jingjia ki leit mar mar ryngkat ki kali pynlip ding ban tem ia ka ding.

U Bah Vivek ula ong, ba 6 tylli ki kali pynlip ding ki la wan poi nalor kiba la pynap lypa ia kiwei pat ki kali pynlip ding lada jia ba kane ka ding ka pur sha kiwei pat ki jaka ba don marajn.

Katba ki pulit pynlip ding ki dang iakhun ban tem ia ka ding, ki pulit ki la pynlong ia ka jingtohkit ban lap ia ka daw kane ka jingpluh ding hynrei haduh mynta kim pat lah ban tip ia ka daw jong kane ka jingpluh ding.

Ha kane ka jingjia jingpluh la iathuh ymn shum la don kiba mynsaw hynrei kiba bun ki jingdon jngem ki shah bam duh ka ding.

Halor kane ka jingjia, u Myntri Sorkar u Bah Sanbor Shullai ryngkat bad ki bor pyniaid district ki la leit mardor sha kane ka jaka bad shimkhia ban pynbiang ia ka jaka sah shipor bad ka bam ia ki lanot kiba la duh ia la ki ïing bad ki jingdon jingem baroh.