Khlad noh u Pastor Robert Cunville, ka jingduh bakhraw ia ka Balang Presbyrterian

U Rev. Pastor Rieweh Robert Cunville uba dei uwei na ki shakri ba la paw ha ka kam u Blei, u la khlad noh hynne ka step ka sngi Saitjain hapdeng ka jingshah sumar ha NEIGHRIMS, Shillong.Kane ka jingkhlad noh jong u Pastor Cunville ha ka rta kaba 86 snem, ka long ka jingduh kaba khraw ym tang ia ka Balang Presbyterian hynrei ka long ka jingduh ia ki Balang Khristan ha kylleng satlak ka pyrthei.Ia ka met basah jong u Pastor Cunville, yn pyndep ha ka 20 tarik, Kyllalyngkot ha u Lum jingtep jong ka Balang Laitumkhrah Presbyterian, Shillong.U Pastor Cunville u dei u khun jong I (L) Dr R.L. Cunville bad (L) Kong Felicia Kharshiing bad la kha ia u Dr Cunville ha ka 15 tarik u Lber 1939 ha Tezpur, Assam.

U Pastor Cunville u dei na ka Balang Presbyterian Laitumkhrah badU dei uba la pawnam bha ban pynsaphriang ia ka khubor jong u Blei ym tang hapoh ka jylla hynrei ha ka ri bad ha kylleng ka pyrthei hi baroh kawei.Kum ban shu pynkynmaw ba u Rev. Cunville u dei uba la pule ia ka BD bad M.Th. na Serampore University ha u snem 1958-65 bad hadien kata ula pyndep ruh ia ka MA (Missions) na Fuller Theological Seminary USA ha u snem 1975.La Ordain ia u da ka KJP Synod ha ka snem 1966 bad ula wanrah ia ka kyrteng sha ka Balang Laitumkhrah ha ka snem 1998.Ula long u Nonghikai ha ka Cherra Theological College, Sohra bad ula trei kum u Youth Secretary ka National Council of Churches 4 snem bad long ruh u Pastor ha ka Union Chappel Calcutta 4 snem.

Hynrei U Blei ula khot ia u ban ai ia ka jingshakri da kaba Ialap ia ka Gospel kylleng ka Pyrthei bad ha ka snem 1977 u Dr Billy Graham ula khot sngewbha ia u ban iatrei lem bad u tad haduh mynta u dang trei bad ka Billy Graham Evangelistic Association ban ialap sha kylleng ka Pyrthei ia ka jingieit bah u Blei ha u Jisu Khrist. Haba u Blei ula khot noh sha lade ia u Dr Billy Graham, u Rev Dr R.R. Cunville ula shah jied ban duwai ha ka sngi ba ontep ia u. Ha ka snem 2010 ula shah jied kum u President ka United Bible Societies bad la jied biang ia u ha ka snem 2016 sa na ka bynta 6 snem. Ha ka snem 2023 ula shah jied pat kum u President ka Emeritus United Bible Societies (UBS).