Pynkhie im ka NSS&CC ia ka Shad Kiew ïing ha ka sngi rakhe dap 50 snem ka Club

Ka Nongpyndeng Sport Social & Cultural Club, ka la ioh ban plie pyrda ia ka jingrakhe dap 50 snem lane Golden Jubilee jong ka Club kaba la seng naduh kham mynshwa hynrei kaba la register pat ha u snem 1976. Ka Nongpyndeng Sport Social & Cultural Club ka dei kawei na ki Club kaba la prat lynti kumno ban sdang bad kyntiew ia ki kam ialehkai sport hapoh Nongstoin, West Khasi Hills District khamtam eh na ka bynta ka Football, Cricket bad kiwei kiwei ki jait jingialehkai kiba la suhthied mynta ha ki samla jong ka dong ka thain.  U MLA ka Nongstoin Constituency u Bah Gabriel Wahlang u la wan kum u kongsan ha katei ka sngi, na ka bynta ban plie pyrda ia katei ka jingrakhe dap 50 snem jong ka Club ha ryngkat ka jingiadonlang u Bah Dressar Marngar kum u symbud kongsan, u Myntri ka shnong Mawkhlam- Nongpyndeng u Bah Balentin Sohlang, u Secretary shnong Bah A.L Syiem, u Lyngdoh ka shnong u Bah F. Sohlang, u President ka NSS&CC u bah J.R Diengdoh, u Dr. L.L Mawsor, Secretary jong ka Club bad kiwei kiwei ki riew rangbah ryngkat ki nongshong shnong.

Ha katei ka sngi la pynshongkun ruh ia katei ka prokram lyngba ki jingshad tynrai, ki jingrwai, ka Dancing Competition, ka Food Fest, ka Penalty Shoot out bad kiwei pat ki jingialehkai pynbyrngia kiba la khring bad pynsngew tynnad ia ki paidbah nongwan peitkai. Haba kren ha katei ka sngi kum u kongsan, u Bah Gabriel Wahlang u la pynpaw ba ka jingdon jong kane ka NSS&CC ka la kyntiew shibun ia ka sap ka phong jong ki samla ha ka shnong bad ka dong ka thain̈.Halor ka jingdonkam jong ka Sport Club, na ka liang u MLA u la kular ban ai ka jingiatreilang na ka bynta ban pynioh ia ki scheme na ka sorkar bad u la noh synniang ruh na ka bynta ka sport Club.

Katba na ka liang u Bah Methodios Dkhar, Minister ka tnad Food and Civil Supply, watla ym shym la lah ban iadon bynta lang ha katei ka sngi, hynrei u la phah ia u kyrwoh kitbok na ka bynta ka Sport Club bad ai ruh ka jingiarap na ka bynta ka NSS&CC.