Ki kam pynroi ki dang sahteng, watla kham shngaiñ ki paidbah: MLA Mookaiaw

U MLA ka Mookaiaw u Bah Nujorki Sungoh ula ong ba watla ki paidbah ki la kham sngew shngain na ka jingdon ki police outpost ha Barato, Psiar bad ha Mukroh hynrei ki kam pynroi pat ki dang sahteng ha katei ka thain khappud. Haba kren halor ka jingeh ki paidbah khamtam halor u pud u sam, u bah Nujorki ula ong ba la shong jingialang la kumba lai sien eiei mynta bad la khmih lynti ban sa lah ban pynbeit ia kane ka jingeh.

“Kumba long mynta ki kam pynroi ruh, na ka liang jong ngi bad ka sorkar la pyrshang ban leh katba ngi lah. Ngi Kyrmen ba ngin sa lah ban weng ia jingeh ha ki khappud.  Ki kam pynroi ba kongsan mynta ngi dang shem jingeh hynrei ki kam barit baria ngi la pyrshang ban wanrah bad kumba long mynta shaduh sha ka thain Mawjem, la pyrshang ban trei na ka liang jong ngi”, la ong u bah Nujorki.U la ong ba ka surok ka dang sah kumto watla ka jingdon ka police Outpost, ka la iarap namar ba kam don shuh ka jingwantur na ki pulit Assam.“Kumba long mynta, ngi don kawei ha Police Outpost ha Barato, Psiar bad ha Mukroh ban ai ka jingshngain ia ki paidbah ha katei ka khappud”, u la ong.

Ki kam ba kongsan kiba ula pyrshang ban iakren ki kynthup naduh ka koit ka khiah, ka pule puthi bad ki dang don bun ki bynta kiba dang hap ban leh.Haba kyrmen ban wanrah noh ia ki kam pynroi kiba kongsan sha katei ka thain, u bah Nujorki ula ong, “Ha kaba mynta sah sa tang ki kam ba kham kongsan kiba ngim pat lah ban shim rai haduh mynta. Ngi kyrmen ba ha ki snem ban wan, ngin lah ban pyntreikam noh ia ki projek ba ngi kwah”.