Jop bad seisoh ka projek Tit ha Nongkseh

Ka Nongkseh Mushroom Cultivation Village Pilot Project kaba la sdang ha Nongkseh ka la long ka projek kaba jop bad kaba seisoh bha. Ia kane ka projek ba la bei tyngka da u Myntri Rangbah ka Jylla u Conrad K. Sangma, la mang ba kin don haduh 200 tylli ki longiing kiban ioh bynta hynrei ia mynta ha ka kylla ba nyngkong la sdang shwa da ki 30 tylli ki longiing.U Rangbah Shnong u Bah Myrank Thangkhiew.

U la ong ba ka shnong da ka mynsiem ka jingsngewshlur ka la pdiang ia kane ka pilot project bad dei ha u bnai Nohprah 2025 ki la sdang ban thung nyngkong ia une u tit.Ula iathuh ba ka jingseisoh jong kane ka projek ka la pynlong ia kiwei pat ki nongshong shnong ba kin kwah ban sdang noh sa ia ka kylla kaba ar jong kane ka projek.Ula iathuh ba ka jingthung ia u tit ka la long kaba seisoh ha kaba ki la ioh ban kheit ia u tit ha u bnai Kyllalyngkot jong mynta u snem. Ula pynpaw ka jingsngewnguh ia u Myntri Rangbah bad baroh kiba don bynta ban pynurlong ia kane ka projek ha kaba bun na ki briew kila ioh ban kamai na ka jingrep ia u tit.

Katba na ka liang ki nongrep tit, ki la iathuh ba kane ka projek ka la ai ka jingkyrmen ia ki ba kin ioh kamai da kane ka kam kaba thymmai kaba ym da  bam ia ka por bad ka bor kumba long kiwei pat ki mar rep.Ki la kyntu ia u Myntri Rangbah ban pynioh sa ia ka Cold Storage kumjuh ia ki mashin ban thad rkhiang ia u tit namar ka dor u tit tyrkhong ka kham heh bad kham bun ka jingdawa. Lah ban kdew hangne ba nalor ka Mendipathar Mushroom project ha rilum Garo, ka projek rep tit ha Nongkseh kadei kaba nyngkong ban sdang kum ka pilot projek ha rilum Khasi Jaintia.