Dawa u Bah Paul ban thaw Task Force ban tohkit bym siew bai bording ki karkhana ha Byrnihat

U MLA ka UDP na West Shillong constituency u Bah Paul Lyngdoh ula dawa na ka Sorkar Jylla ban thaw da ka Special Multi-Disciplinary Task Force ban tohkit ia ka jingkynnoh tuh bording bad bym siew bai bording ki karkhana ha Byrnihat industrial bad ha Rajiapala GIS. Ïa kane u Bah Paul u la dawa haba wanrah ia ka Cut Motion hapoh ka iingdorbar ban ïatai halor ka jingsngewkhia halor ka rukom treikam ka tnad Bording khamtam haba iadei bad ka jingslem ban phah ia ki Bill thang bording sha ki paidbah, ka jingbym siew bai bording bad ka jingjur ka jingtuh bording ki karkhana.U Bah Paul u la kynnoh ba don ka jingiasylla hapdeng ki heh jong ka tnat Bording bad ki karkhana haka thain Byrnihat, kaba pynlong ia ka tnat ban duh nong haba ia dei bad ka khajna kaba wanrah ka jingduh nong kylla iaka Jylla.

Haba jingkren, u Bah Paul ula iathuh ba ka Substation ha Raijapala ka la sniew palat bad ka lah ban khyllem ha kano kano ka por, hynrei ka tnat ka dang iaid beit ban pyntreikam khlem ka jingpynmih pisa ban maramot.U la pynpaw ba bun ki don ki karkhana kiba sah ram naka T.10 lak haduh palat T.1 klur hynrei ka tnat Bording kam shym la ot ia ka Bording ne ka khlem shim kino kino ki sienjam ban pynshitom ïa kum kita ki karkhana.“Ka tnat Bording ka dei ban thaw da ka Special Multi-Disciplinary Task Force ban tohkit ia ka jingkynnoh tuh bording bad bym siew bai bording ki karkhana ha Byrnihat industrial bad ha Rajiapala GIS” la ong u Bah Paul. U Bah Paul ula ai jingmut ruh ia ka tnat Bording ban don da ka kynhun pahara ba kyrpang (24/7) ban peit ia ka jingtuh bording ha ki thain Byrnihat.

Haba shim bynta ha ka jingiatai, u MLA ka VPP na Nongkrem, u Bah Ardent Miller Basaiawmoit ula kynnoh ba ka tnat ka pynpoi ia ki Bill bai thang bording hadien shisnem lane ar snem bad kane ka pynlong ia ka bai thang bording ki paidbah ban kiew da ki phew hajar bad teng teng ka poi ruh haduh shi lak tam. U Bah Ardent u la kyntu ia ka Sorkar ban shna ia ka Policy thymmai bad lada ka tnat ka slem ban shna ia ki Bill kam dei ban phah siew sut (Interest) ia ki nongshong  shnong.