Lap ka FKJGP ba dang shu sdang trei ïa ka EMRS wat hadien 2 snem

Ka Federation of Khasi-Jaiñtia Garo People (FKJGP) South West Khasi Hills District ha ka Sngi Balang ki la hiar jurip halor ka jingpyntrei ia ka skul Eklavya Model Residential School (EMRS) ha ka shnong Domjyrti, 8 KM eiei na Mawkyrwat bad ka la pynpaw ia ka jingsngewdiaw ban lap ba ka jingpyntrei ia kane ka projek kaba heh ka dang shu ieng tang ki nar rod suda.
Haba kren ha ki lad pathai khubor, u General Secretary ka FKJGP South West Khasi Hills, u Bah Balse Kharbani u la iathuh ba ka jingleit jurip jong ka seng ia kane ka skul kadei halor ka nongrim ba ka la ioh shibun ki jingujor na ki paitbah halor ka jingsuki palat jong u Contractor ban pyntrei ïa kane ka skul kaba la dep ban buh mawnongrim
da u Myntri Rangbahduh ka Ri India, u Narendra Modi lyngba ka ‘conference’ naduh ka 15 tarik u Naiwieng, 2024.
Kumta, u bah Bah Balse u la pynpaw ïa ka jingsngewdiaw ban iohi ba ka jingpyntrei ka suki bha, bad u la kyntu jur ïa u kontraktor ba udei ban kham pynstet noh kloi ïa ka jingpyntrei namar kumba long mynta tang ki paia ruh ym pat lah ban pynieng. Ha kajuh ka por u la maham jur ruh ïa u kontraktor ba um dei ban ïalam trei ïa ki bar jylla namar ba ki briew lajong bad napoh ka distrik ki la lah ban trei ia kum kine ki kam.
Ha kawei pat ka liang, u Bah Balse Kharbani u la pynpaw ïa ka jingkmen halor ka jingwan jong kane ka skul hapoh ka distrik ka ban long shisha ka jingkyrkhu ïa ki khynnah pule kane ka dong ka thaiñ.
Ha kawei pat ka liang, ka FKJGP South West Khasi Hills hapoh ka jingialam u President, Bah Kenesjune L. Nonglait mynta ka sngi ka la leit ban noh synniang ïa kawei ka longïing jong kawei ka riewkynthei ha ka shnong Mawbidong, South West Khasi Hills District kaba la shah pynjot noh ia ka iing ha ka ha ka jingpluh ding kaba la jia ha ka 5 tarik u Lber 2026.
Kane ka longïing kadei jong ka kong Rosinabel Syiemlieh, ka riewkynthei kaba don hynriew ngut ki khun bad kaba donkam kyrkieh ïa ka jingiarap namar bun na ki jingdon jingem bad ki mar ki mata ki la shah bam duh lut ha ka ding.
Ka seng ha kane ka sngi ha ryngkat ka jingdon lang u Myntri shnong Mawbidong, u bah Tanlumbor K. Kharai da ka mynsiem sngewlem ka la noh synniang da ki marbam, ki tiar shet, ki jainkup bad ka song pisa ïa kane ka longkmie.
Ka seng bad ka shnong ki la kyrpad ïa ki bor distrik ba kin pynkloi ka jingïarap sha kane ka longïing bad ha kajuh ka por ki la kyntu ruh ïa ki nongmihkhmat ba kin phai khmat lem sha kane ka longïing kaba donkam jingiarap shisha ha kum kane ka por.