Ha ka 25-27 tarik yn long ka 1st Shillong International Film Festival

Kum shi bynta ban kyntiew iaka kam shna film bad pynshlur iaki samla, ka tnat Directorate of Information and Public Relation (DIPR) ka Sorkar Jylla hynne ka sngi kala pynbna ban pynlong iaka 1st Shillong International Film Festival naduh 25 haduh 27 tarik Lber 2026 ha State Convention Centre.
Ha kane ka Shillong International Film Festival kan don ruh ka jingpyni iaki film napoh ka Jylla bad na kiwei pat ki Jylla ka Ri India nalor kiwei pat film bad ki Documentary na bar Ri.
Haba pynbna ïa kane u Myntri ba khmih iaka tnat DIPR u Bah Lahmen Rymbui u la ong ba ha kane ka Festival ba lai sngi, ka don ruh ka jingai jinghikai pyntbit iaki samla napoh ka Jylla daki riew shemphang haba iadei bad ka kam shna film.
U Bah Lahkmen u la ong ba baroh ki tip baka Jylla Meghalaya kadei ka jaka kaba itynnad bad kaba don lad ban khring iaki nong shna Film
na kylleng ka Ri India bad na bar Ri ban wan shna Film shapoh ka Jylla.
U la ong ba ka Jylla ka pahuh bha ka jingdon ki nongshna Film ba kynsai bad ka jingdon ki samla kiba kwah shisha ban tbit haka kam shna Film bad ka jingpynlong iaka Shillong International Film Festival, kan plie lad iaki samla ban ioh jinghikai pyntbit na kiwei pat ki riew shemphang ha kane ka kam.
“Mynta u snem ka Sorkar Meghalaya lyngba ka tnat DIPR ka pynlong ïa ka 1st Shillong International Film festival naduh ka 25 tarik haduh 27 tarik Lber ha State Convention Centre bad kane kan dei ka jingsdang ha kaban pynshlur iaki nongshna Film ban shim kabu iaka jingitynnad ka mei mariang jong ka Jylla Meghalaya ka ban long ka Jylla kaba khring iaki nong shna Film ym tang napoh India hynrei wat na bar Ri ruh kumjuh” la ong u Bah Lahkmen.
U Myntri ula pynksan ruh baka kam shna Film kam dei kaba dang thymmai hapoh Meghalaya namar naduh ki por mynshwa kila don bun tylli ki Film kiba la shna hi daki nong shna Film trai Jylla. “Ki don shibun ki nongshna Film kiba dang sdang iaka kam bad ha kane ka Shillong International Film Festival kan don ka jing ai jinghikai pyntbit ia ki nongshna Film bad iaki samla kiba kwah ban sdang ïa kane ka kam” ula ong.