Kynthoh u Bah Prestone ia ka Congress, hato kam ïohi ia ka jingangnud ki paibah

U Symbud Myntri Rangbah ba khmih iaka tnad District Council Affairs (DCA) u Bah Prestone Tynsong ula kynthoh tyngeh ia ka Meghalaya Congress da kaba ong “Hato ka Congress khamtam kaba peit ba khmih sha Garo Hills, kam ïohi mo ia ka jingangnud ki paibah”.Ïa kane u Bah Prestone ula kynthoh halor ka jingdawa ka Congress ba ka Sorkar kadei ban pynlong beit iaka Elekshon MDC sha Garo Hills Autonomous District Council (GHADC) na ka bynta 27 tylli ki constituency lait noh ha ki 2 tylli ki constituency kata ka Shyamnagar bad Balachanda Constituency.

Haba kren sha ki lad pathai khubor u Bah Prestone ula ong ba kane ka jingdawa ka Meghalaya Pradesh Congress Committee (MPCC) kadei ka bym shongnia bad kadei ka jingdawa khlem ka jingkitkhlieh.U Bah Prestone ula ong ba ka Sorkar ka shimkhia haba iadei bad ka jingangnud, ka jingdawa bad ka jingsngew jong ki paidbah bad dei namar kane ka Sorkar ka hap ban shim iaka rai ban pynsangeh shwa iaka Elekshon GHADC.“Hato ka MPCC khamtam kaba peit ba khmih sha Garo Hills, kam ïohi mo iaka jingangnud ki paibah, kata kadei kaba nga kwah ban kylli” la ong u Bah Prestone.

U Symbud Myntri Rangbah ula ong, ba um sngewthuh ia ka jingmut haba iadei bad ka jingdawa ka Congress. “Hato ka biang seh ban nym pynlong Elekshon ha ki 2 tylli ki constituency. Kane ka jingdawa kadei ka jingdawa khlem da don ka jingkitkhlieh” ula buh jingkylli.Ula ong, ba kane ka jingdawa kadei ka jingdawa tang ban woh nia bad woh daw, ia ki sienjam bad ia ka rai kaba ka Sorkar ka shim.