Ka jingiakynad ha Garo Hills ka mih namar bym lah ban pynbeit ia ka jingdawa ban khanglad ia ki bar jylla ban iashim bynta ha ka ilekshon GHADC

U nongialam Liang pyrshah u Dr. Mukul Sangma hynne ka sngi ula leit iakynduh ia u Lat ka jylla u CH Vijayashankar ban kyntu ban tuklar halor ka jinglong jingman ka shongsuk shongsain ka Rilum Garo kaba thmu ban pynlong ia ka ilekshon Garo Hills Autonomous District Council Election (GHADC), 2026.

Haba kren sha ki lad pathai khubor u Dr. Mukul ula ong, ba ula kyntu ia u Lat ka jylla ban thung ia ka jingtohkit ba laitluid halor ka jingpynmih ia ka jingpynbna ba ia dei bad ka ilekshon bad ia ki daw ban poi sha ka jingiakynad ki briew kiba donkti ban ai ding bad ka jingiap briew ha rilum Garo.

U Dr. Mukul ula ong ba ki kynrum kynram ha Garo Hills ka la mih hadien ba ym shym la lah ban pynbeit ia ka jingdawa jong ki kynhun nongialam kiba mihkhmat ia ka jaidbynriew Garo ban khanglad ia ki bar jylla ban iashim bynta ha ka ilekshon sha Garo Hills Autonomous District Council (GHADC).

Ula ong ba ka jingpynmih ia ka jingpynbna u CEM barim ka GHADC halor ka ilekshon GHADC bad ka jingialang beain ba la pyllong ha thain Phulbari da uwei u MLA barim, ka la pynmih ia ka jingbym hun bad ka jingiakynad.

“Kine ki jingjia ki pyllong ban pynmih ka jingsyier bad ka jingiakynad hapdeng ki kynhun bapher ha ka thain ha kaba ar ngut ki duh ei ia ka mynsiem ba kordor,” ula ong.

Ula ong ba kine ki jingjia ki mih namar ka jingbym lah ka sorkar jylla ban tehlakam ha ka por ba biang ban iada ia ka jingiakynad iapher jaidbynriew.

Na ka liang u nongialam ka Liang pyrshah, ula pynpaw ka jingsngewkhia halor ka rukom leh ki pulit kiba la shu kem naphang khlem da bishar bniah kaba lah ban ialam sha ka jingbym ioh ia ka hok bad ka jingshisha bad ka lah ban pynbitar shuh shuh ia u paidbah.

“Ban wanrah ia ka jingkhuid bad ban ai ia ka jingbishar hok ia ki paidbah, la phah ka jingtyrwa sha ka sorkar jylla ban thung kynhun tohkit ba laitluid ban tih bniah ia ki daw kiba ialam sha ka jingiakynad ha Garo Hills,” ong u Dr. Mukul.

Ha kajuh ka por, ula pynpaw ka jingsngewtynnad ba ka shongsuk shongsain ka la sdang ban wan biang ha ka rilum Garo, namar ka jingtuklar da ki nongialam niam bad ki nongialam ba rangbah ka West Garo Hills.