Uwei u Ribon khap u MLA Mylliem bad u Bah Lambor, ïoh ka Pomlakrai Parish 2 tylli ki surok

U MLA/MDC barim ka Nongkrem Constituency u Bah Lambor Malngiang bad u Bah Ronnie V Lyngdoh MLA jong ka Mylliem ha ka sngi Saitjain ki plie ar tylli ki surok bad ka jaka shong paidbah ha Rangbihbih Pomlakrai Parish ha ka jinglut ba kot T.2 klur ba la kyrshan da ka sorkar Jylla. Kawei ka surok ba la shna ka dei sha ïingmane bad kawei pat ka surok ka dei sha ka jaka sah ki Sister bad ka jingplie paidbah ia kine ki jingtei ka long shisngi shuwa ban plie ia ka Rangbihbih Pomlakrai Parish hynne ka Sngi u Blei.

Kine ki jingtrei ki dei ba la pynlut haduh T.2.10 klur ka pisa ba la ioh na u Myntri Rangbah ka Jylla Conrad K Sangma bad kumjuh na u Symbud Myntri Rangbah ba khmih ia ka Tnad PWD (Roads) Bah Prestone Tynsong bad ia kine ki jingtei la plie da u Bah Lambor Malngiang ryngkat ka jingiadon lang u Rev. Fr. Tobias Kharngapkynta, u Rev. Fr Genessimus Nongneng bad kiwei kiwei. Haba ai jingkren, u Bah Lambor Malniang ula ong, ba u dei tang u briew uba  trei mon sngewbha namar mynta um shim la ioh shuh ban long kum u nongmihkhmat hynrei u don ia ka mynsiem ban trei na ka bynta ka constituency bad ki paitbah ka jylla.

U la ai khublei kyrpang ïa u Myntri Rangbah bad ïa u Bah Prestone Tynsong kiba la sngap ïa ka jingkyrpad jong u na ka bynta ka bit ka biang jong ki paidbah ka Nongkrem Constituency. Katba na ka liang jong ki Father bad ki Sister ki la pynpaw ka jingsngewnguh ïa u Bah Lambor Malniang bad ïa u Bah Ronnie V Lyngdoh MLA jong ka Mylliem kiba la kloi ban sngap ia ka jingud jingnam jong ki paidbah.