Ka Meghalaya ka duna ki ‘Doctor Specialist’, ngi don tang 30 percent: Wailadmiki Shylla

U Myntri ka tnad ka koit ka khiah ka jylla u bah Wailadmiki Shylla ula iathuh ba ki Doctor Specialist ha kane ka jylla ki duna haduh kumba 70 percent eiei.Haba kren sha ki lad pathai khubor, u bah Wailad ula ong ba ka jylla Meghalaya ka dang duna palat ki doctor specialist bad kumba 70 percent ki kam kiba la mang ki shu sah thylli sah haduh mynta.“Na ka 100 percent ka jingdonkam Doctor, mynta ngi don tang kumba 30 percent ki Doktor Specialist. Kane ka mut ba kumba 70 percent ki kam specialist ki dang sah thylli haduh mynta,” ong u bah Wailad.Katkum ka jingong u Myntri, ka jingduna ki Doktor ka dei namar ba bun ki doktor specialist, ki artatien ban rung ne ban trei ha ka kam sorkar namar ka jingphah leit trei sha ki jaka nongkyndong.

“Bun ki doktor kim treh ban leit ban ai jingshkri sha ki thain Nongkyndong. kane ka la buh jingeh ia ka sorkar ban pyndap ia ki kam Specialist kiba sah thylli,” ula ong.Ula ong ban weng ia kane ka jingeh, ka sorkar ka la phah ia ki doktor ban leit shah pyntbit shipor, khnang ban lah ban iarap katba lah ban pynbiang ia ka jingdonkam ki doktor bad la bynrap, “Watla ka sorkar ka la pyrshang ban pynrung kam la bunsien, ka jylla kam pat lah ban pyndap lut ia baroh ki kam kiba sah thylli.”Ula ong, “ Ki Doktor ki don, hynrei bun kim treh ban rung sha ka kam sorkar bad bun ki jied ban leit wad lad shawei hadien ba kiladep ia ka jingpule,” ong u bah Wailad. Shuh shuh u la ong ba ka jylla ka dang shaniah ha ki doktor kiba leit ban pule na ka bhah ka sorkar pdeng ha kaba ki don kumba 60 ne 70 ngut ki samla kiba dang pule ia ka MBBS man u snem.“Hynrei napdeng kine ki samla ruh hadien ba ki ladep ban pule, bun ki jied ban siew noh ia ka pisa ne ka Bond, khnang ba kin ioh ban leit trei noh sha kiwei ki jaka,” ula ong.

U Myntri ka tnad ka koit ka khiah, ula ong ban weng ia kane ka jingeh , ka sorkar jylla ka la pylleit jingmut ban pyniar ban kyntiew ia ki jaka pule doktor kiba don ha kane ka jylla kynthup ka Shillong Medical College, Purno A Sangma Medical College kaba iatreialng bad ka University of Science and Technology Meghalaya (USTM), bad ka Tura Medical College bad la khmih lynti ba na kine ki jaka kan iarap ban pynmih bun ki doktor na ka jylla hi.“ Lada baroh ki iaid katkum ka jingthmu, ngi khmih lynti ban pynmih kumba 250 doctor man u snem na ka jylla hi,”ula ong. U bah Wailad ula pynpaw ka jingkyrmen ba kine ki sienjam kin iarap ban weng ia ka jingduna doktor bad kan pynkhlain ia ka jingai jingshakri sha ki paidbah ka jylla.